Shtëpia e Bardhë po shtyn përpara një nga projektet ambicioze të Presidentit Donald Trump për të ndërtuar një hark gjigant Triumfi në Uashington, në 250-vjetorin e pavarësisë së Shteteve të Bashkuara.
Shtëpia e Bardhë ka njoftuar planet për të ndërtuar një hark triumfi në Uashington DC për të shënuar 250-vjetorin e pavarësisë së Shteteve të Bashkuara nga Britania e Madhe.
Sekretarja e Shtypit, Karoline Leavitt, u tha gazetarëve të mërkurën se Presidenti Donald Trump dhe Departamenti i Brendshëm do të paraqesin zyrtarisht projektin ndaj një bordi shqyrtimi.
Nëse miratohet, harku do të jetë 76 metra i lartë nga baza e tij deri te një pishtar i ngritur nga një figurë e ngjashme me Zonjën e Lirisë në majë të strukturës. Figura do të shoqërohet nga dy shqiponja dhe do të ruhet në bazë nga katër luanë të larë në ar.
Frazat ‘Një Komb nën Zotin’ dhe ‘Liri dhe Drejtësi për të Gjithë’ do të jenë të shkruara me shkronja ari në të dyja anët e monumentit.
Projekti është aktualisht objekt i një procesi gjyqësor, pasi një grup veteranësh dhe një historian kanë ngritur padi për të bllokuar ndërtimin, me arsyetimin se harku do të prishë pamjen midis Memorialit të Linkolnit dhe Varrezave të Dëshmorëve.
Harku i Triumfit është një nga projektet që Trump po zhvillon për të lënë një gjurmë të përhershme në Uashington.
