Në shënimin e 81-vjetorit të lindjes së Presidentit historik Dr. Ibrahim Rugova, Kosova rikthehet në kujtesën e një epoke që ndryshoi fatin e saj përgjithmonë.
Rugova mbetet figura më emblematike e historisë moderne të vendit—një intelektual i rrallë, filozof politik, krijues i vizionit të shtetësisë dhe arkitekt i rrugës paqësore drejt lirisë. Në kohën kur vendi përballej me represion, pasiguri dhe errësirë politike, Rugova u shndërrua në simbol të qetësisë, urtësisë dhe këmbënguljes.
Ai e artikuloi çështjen e Kosovës në qendrat më të rëndësishme të botës perëndimore, duke e çuar atë nga margjina në tavolinat e Uashingtonit, Brukselit dhe kancelarive evropiane.
Rugova ishte shumë më tepër sesa presidenti i parë i Kosovës së lirë—ai ishte frymëzim moral, prijës shpirtëror dhe njeriu që i dha politikës shqiptare dimensionin human e civilizues.
Me filozofinë e tij të rezistencës paqësore, me vendosmërinë për të ruajtur aleancat ndërkombëtare dhe me modelin e udhëheqjes që bashkonte, jo ndante, ai la pas një trashëgimi të paçmuar që edhe sot udhëheq shtetin e Kosovës në rrugën e integrimit euroatlantik.
Në këtë përvjetor, vendi e nderon jo vetëm kujtimin e tij, por edhe amanetin e tij për një Kosovë demokratike, moderne dhe të lidhur fort me botën perëndimore.
Rugova ishte udhërrëfyes hyjnor
Në 81-vjetorin e lindjes së Rugovës, analisti Haki Latifi, në një prononcim për “Bota sot”, ka kujtuar figurën e udhëheqësit të shtetit dhe të shpirtit, të cilin e quan “burrin e Dardanisë” dhe “intelektualin që kishte tejkaluar përmasat kombëtare”.
Latifi sjell një panoramë të qartë të Rugovës, duke e përshkruar si një personalitet të pazëvendësueshëm të kombit.
Haki Latifi
“Në kuadër të 81-vjetorit të lindjes së Presidentit historik Dr. Ibrahim Rugova, përkujtojmë burrin e Dardanisë, intelektualin që kishte tejkaluar përmasat kombëtare, dhe i cili hyri në radhën e politikanëve e filozofëve politik më të spikatur të Europës postkomuniste e më gjerë”, thekson Latifi.
Ai e cilëson Rugovën si “emërbardhin e Abrahamit hyjnor”, një udhërrëfyes që spikaste për urtësi, vizion dhe karakter unik.
“E përkujtojmë… shpresën optimiste për prosperitet, urtakun profetik e liderin kombëtar e shpirtëror, politikanin më karizmatik që ka pasur Kombi Shqiptar, të ndriturin, Presidentin historik të Kosovës, Dr. Ibrahim Rugova. Ai ishte interpret i shpirtit shqiptar të lirisë”, shton Latifi.
Sipas tij, Rugova ishte njeriu që e ktheu Kosovën drejt Perëndimit dhe miqve të saj natyrorë.
“Ai e ktheu Kosovën dhe çështjen e saj drejt Perëndimit, drejt aleatëve tanë të natyrshëm: Uashingtoni dhe Brukseli. Faleminderit President Rugova që me angazhimin tuaj të pashoq, sakrificiat shekullore të shqiptarëve për Liri e Pavarësi i shndërruat në realitet dhe Kosovën e bëtë shtet”.
Latifi nënvizon se Kosova ishte me fat që e pati Rugovën si lider shpirtëror, njeri vizionar dhe simbol të mençurisë.
“Ai u shndërrua në model të prijësit… Presidenti Rugova i dha politikës dimensionin më të çmuar, atë human. Në personalitetin e tij është parë historia e popullit të Kosovës”, deklaron Latifi.
Për Latifin, Rugova ishte garancia morale e Kosovës, njeriu që bashkoi popullin dhe ndërtoi themelet e shtetit modern.
“LDK-ja së bashku me Ibrahim Rugovën i bëri bashkë të gjithë pa dallime… Rugova e shndërroi veten në emblemë politike. Ai na e tregoi rrugën që duhet ndjekur, por pa i humbur vlerat njerëzore”.
Latifi kujton edhe përmasën intelektuale e filozofike të Rugovës.
“Studiuesi i Pjetër Bogdanit dhe specializanti i prof. Robert Barthesit ishte unikat… aplikoi mosdëgjueshmërinë kolektive, refuzimin, dhe organizoi e krijoi shtetin e Republikës së Kosovës. ‘Shtëpia pa miq nuk mbahet’, thoshte shpesh Rugova”, shton Latifi.
Ai e krahason Rugovën me figurat biblike mbi udhëheqjen, duke theksuar sakrificën dhe përkushtimin e tij.
“E ndau fatin me popullin, duke e ruajtur substancën e tij, si Moisiu biblik”.
Latifi përmbyll mesazhin e tij duke e pozicionuar Rugovën si simbol të përhershëm të shpresës dhe të orientimit euroatlantik të Kosovës:
“Rugova mbeti humanist dhe ideator i një projekti madhor për një shtet të pavarur të Kosovës në paqe me fqinjët. Republika moderne e Kosovës i detyrohet parimeve të Rugovës… Përmes këtyre atributeve, Presidenti Dr. Ibrahim Rugova është bërë simbol i shpresës dhe vendosmërisë për gjeneratat e ardhshme”, përfundon Haki Latifi për “Bota sot”.
Rugova ishte profeti i kombit – vetëm rruga e tij është shpëtimi ynë
Kurse, ish-bashkëluftëtari i heroit Sali Çekaj, Saim Tahiraj, e ka cilësuar Rugovën si figurën profetike që e orientoi kombin drejt shpëtimit.
Tahiraj thotë se kombi ynë “pati fatin e madh” që në kohën më kritike të historisë, Zoti t’i dërgonte shqiptarëve një udhëheqës të përmasave profetike.
Saim Tahiraj
“Populli ynë pati fatin e madh që, në momentet më të vështira kur rrezikohej vetë qenia jonë kombëtare, Zoti t’ia dërgonte një profet të ri, ashtu siç ia kishte dërguar shekuj më parë Gjergj Kastriotin”, shprehet Tahiraj.
Sipas tij, Rugova ishte njeriu që me qetësinë, urtësinë dhe vizionin e tij arriti ta orientojë popullin drejt aleatëve natyralë të shqiptarëve.
“Me urtësinë e tij profetike, me vizionin dhe largpamësinë thuajse hyjnore, ai u bë dhe do të mbetet përgjithmonë shpëtimtari i qenies sonë kombëtare. Ai ishte busulla që e drejtoi popullin kah Perëndimi dhe SHBA-të, duke e rreshtuar aty ku shqiptarët e kanë pasur historikisht vendin dhe sigurinë.”
Tahiraj thekson se Rugova e vazhdoi rrugën e udhëheqësve të mëdhenj të kombit, duke theksuar idenë perëndimore të lirisë.
“Ai vazhdoi rrugën e Gjergj Kastriotit, Pjetër Bogdanit dhe Rilindasve tanë, duke e dëshmuar se ‘Dielli për shqiptarët lind gjithmonë në Perëndim’. Kjo ishte rruga e vetme drejt Lirisë dhe Pavarësisë së Kosovës”, thekson Tahiraj.
Ai kujton se Rugova arriti të krijojë miqësi të mëdha ndërkombëtare dhe të sigurojë mbështetjen vendimtare të SHBA-së në kohën kur populli shqiptar përballej me rrezikun e zhdukjes.
“Me mençurinë e tij profetike ai arriti të krijojë miqësi të mëdha dhe të bindë botën demokratike perëndimore – sidomos SHBA-të – të mbështesin aspiratat tona për liri e shtet.”
Tahiraj paralajmëron për rreziqet që i kanosen Kosovës së sotme, duke theksuar nevojën e rikthimit në rrugën e Rugovës.
“Sot, kur e shohim gjendjen e rëndë në Kosovë – me depërtimin e ideologjive të huaja lindore që përmes Islamit Politik synojnë të shkatërrojnë identitetin tonë kombëtar; me polarizimin ekstrem; me prishjen e marrëdhënieve me miqtë tanë – e kuptojmë më dhimbshëm se kurrë sa shumë na mungon vizioni i tij”, shton Tahiraj.
Në fund, Tahiraj shpreh qartë qëndrimin e tij se vetëm rruga e Rugovës garanton ekzistencën e Kosovës si shtet.
“Vetëm rruga që nisi dhe ndërtoi Profeti Rugovë është shpëtimi ynë kombëtar. Ajo është garancia e ekzistencës sonë si popull dhe si shtet. Prandaj, duhet t’i kthehemi kësaj rruge me vepra konkrete, jo me fjalë boshe”, përfundon Saim Tahiraj për “Bota sot”.
