Vaksinimi me vaksinën mRNA kundër COVID-19 para ose gjatë shtatzënisë nuk shoqërohet me autizëm apo çrregullime të tjera neurozhvillimore te fëmijët e vegjël, sipas një studimi të ri të prezantuar në Takimin për Shtatzëninë 2026 të Shoqatës për Mjekësinë Materno-Fetale (SMFM). Gjetjet shtojnë provat mbi sigurinë e vaksinimit gjatë shtatzënisë.
Në SHBA rekomandohen dy lloje vaksinash kundër COVID-19: vaksina mRNA dhe vaksina me nënnjësi proteike. Të dyja konsiderohen të sigurta në çdo fazë të shtatzënisë dhe këshillohen për të mbrojtur nënën dhe foshnjën.
Studimi u realizua nga rrjeti Maternal-Fetal Medicine Units dhe përfshiu 434 fëmijë të moshës 18–30 muaj. Prej tyre, 217 kishin lindur nga nëna që kishin marrë të paktën një dozë vaksine mRNA gjatë shtatzënisë ose brenda 30 ditëve para konceptimit, ndërsa 217 të tjerë nga nëna të pavaksinuara në të njëjtën periudhë.
Rezultatet treguan se zhvillimi neurozhvillimor ishte i barasvlershëm mes dy grupeve. Rezultati total në pyetësorin Ages and Stages (ASQ-3) ishte i ngjashëm (255 kundrejt 260), pa dallime domethënëse statistikore. Nuk u konstatuan ndryshime as në testet e tjera të sjelljes dhe zhvillimit, përfshirë vlerësimet për autizëm.
Për të siguruar krahasim të drejtë, nënat u përputhën sipas vendit dhe datës së lindjes, sigurimit shëndetësor dhe racës. U përjashtuan lindjet para javës së 37-të, shtatzënitë multiple dhe rastet me anomali të mëdha kongjenitale.
Sipas autorëve, gjetjet ofrojnë siguri mbi shëndetin afatgjatë të fëmijëve të lindur nga nëna të vaksinuara gjatë shtatzënisë. Studimi u mbështet nga Instituti Kombëtar i Shëndetit të Fëmijës dhe Zhvillimit Njerëzor “Eunice Kennedy Shriver” dhe do të publikohet në shkurt 2026 në revistën shkencore PREGNANCY. / Scitech Daily – Syri.net
