Një studim i ri i gjerë tregon se zakonet e dobëta të gjumit, mund ta bëjnë trurin të duket fizikisht më i vjetër se mesatarisht rreth një vit. Për studimin, studiuesit shqyrtuan skanimet e trurit dhe modelet e gjumit të më shumë se 27,000 të rriturve të moshës së mesme dhe të moshuar në Mbretërinë e Bashkuar.
Studimi, i botuar në eBioMedicine, përdori imazhe të avancuara të trurit dhe inteligjencë artificiale për të vlerësuar ‘moshën e trurit’, bazuar në mbi 1,000 karakteristika të trurit.
Ndërkohë, për të matur cilësinë e gjumit, studiuesit shqyrtuan pesë faktorë – nëse dikush është person që fle në mëngjes apo në darkë, sa orë fle (ku shtatë deri në tetë konsiderohen më të mirat), nëse ka pagjumësi, nëse gërhet dhe nëse ndihet shumë i përgjumur gjatë ditës.
Bazuar në këto tipare, ata i dhanë secilit person një ‘pikë gjumi’. Njerëzit me katër ose pesë tipare të gjumit të shëndetshëm konsideroheshin si gjumëtarë të mirë, ata me dy deri në tre ishin të nivelit të ndërmjetëm dhe ata me zero ose një ishin gjumëtarë të dobët.
Vetëm 41% e pjesëmarrësve u klasifikuan si persona me gjumë të mirë, më shumë se gjysma ranë në grupin e ndërmjetëm dhe rreth 3% kishin gjumë të keq.
Për çdo rënie prej një pike në rezultatin e gjumit, hendeku midis moshës së trurit dhe moshës aktuale zgjerohej me rreth gjysmë viti. Të qenit buf nate, të fjeturit shumë ose shumë pak dhe gërhitja, treguan lidhjet më të forta me trurin që duket më i vjetër.
Megjithatë, lajmi inkurajues është se zakonet e gjumit mund të përmirësohen. Mbajtja e një orari të rregullt gjumi, shmangia e kafeinës, alkoolit dhe ekraneve para gjumit, si dhe krijimi i një mjedisi të qetë dhe të errët për gjumë, të gjitha mund të ndihmojnë në përmirësimin e cilësisë së gjumit dhe në mbrojtjen e shëndetit të trurit./ DPA News.
