Corey Warren, një i rikuperuar nga varësia ndaj alkoolit, thotë se ekziston një shenjë shumë e qartë që tregon se dikush nuk është më konsumues “rastësor”: “errësimi”, pra një situatë në të cilën personi nuk mban mend çfarë ka ndodhur ndërsa ka qenë i dehur.
Corey, i cili vjen nga shteti i Michiganit, rrëfen se ka nisur të luftojë me varësinë që në moshë të re. Pas disa peripecish dhe disa herë rehabilitim, ai ka qenë i kthjellët që nga viti 2011. Ai flet rregullisht për përvojën e tij dhe në një video të fundit në YouTube shpjegon në detaje se si dallon tre llojet e njerëzve që konsumojnë alkool.
Si baba që ka pranuar se gjatë periudhës së varësisë ishte “i dehur që në orën 10 të mëngjesit”, Corey tregon se si ndryshon sjellja nga personi në person dhe si ai i identifikon shenjat e mundshme të një problemi.
Pijedashësi social
Sipas Corey-t, pijedashësi social është “lloji i personit që të gjithë do të donin të ishin”: ai që mund të pijë një, dy apo tre gota dhe të kthehet në shtëpi pa asnjë problem. Ky person i njeh kufijtë e vet dhe zakonisht konsumon alkool vetëm gjatë fundjavës ose në raste të veçanta.
Pijaneci që pi për t’i shpëtuar diçkaje
Lloji i dytë, sipas përshkrimit të Corey-t, duket sikur e ka jetën plotësisht nën kontroll — familjen, punën, jetën sociale. Por, siç thekson ai, çelësi qëndron te arsyeja pse ai pi. Ky person përdor alkoolin kur ndihet i trishtuar, i vetmuar, i mërzitur, i zemëruar apo edhe i gëzuar. Alkooli bëhet mekanizëm përballimi me emocionet, dhe sipas Corey-t, pikërisht aty nis problemi.
Personi i varur nga alkooli
Corey thekson se i varuri nuk është domosdoshmërisht ai që shumë njerëz përfytyrojnë — personi që zgjohet duke pirë, që përfundon në spital apo në qendër rehabilitimi. Sipas tij, personi i varur nuk pi më për t’u argëtuar, por sepse beson se i duhet alkooli për të funksionuar. Nuk bëhet fjalë për dobësi, por për faktin se “alkooli ka pushtuar trurin” dhe se personi mendon se nuk mund të jetojë pa të.
Corey rrëfen se ai vetë ka jetuar për “vite të tëra” në varësi, pa e kuptuar sa shumë kontroll kishte humbur.
Shenja që tregon se dikush nuk pi më “rastësisht”: errësimi
Sipas Corey-t, shenja më e qartë se dikush ka kaluar nga pirja “herë pas here” në një problem të vërtetë është “errësimi”: momenti kur personi nuk mban mend ngjarjet e asaj nate.
Ai thotë se dikur mendonte se kjo ishte pjesë normale e daljes, por tani beson se errësimi nuk ndodh sepse dikush ka pirë shumë një herë, por sepse toleranca ndaj alkoolit është rritur aq shumë sa personi vazhdon të pijë përtej kufijve të trupit pa e kuptuar.
