Gjykata e Apelit ka ndryshuar aktgjykimin e shkallës së parë, duke liruar nga akuza Agim Çekun dhe nëntë ish-anëtarë të Komisionit Qeveritar për Verifikimin e Veteranëve. Apeli ka vërtetuar edhe lirimin e Nuredin Lushtakut dhe Smajl Elezajt.
Gjykata e Apelit e Kosovës ka rrëzuar pjesën dënuese të aktgjykimit të Gjykatës Themelore në Prishtinë në rastin e njohur si “Veteranët”, duke liruar nga akuza Agim Çekun dhe nëntë të akuzuar të tjerë.
Kolegji penal i Departamentit Special të Apelit ka aprovuar ankesat e mbrojtjes dhe ka ndryshuar aktgjykimin e 12 shtatorit 2025, me të cilin dhjetë prej të akuzuarve ishin shpallur fajtorë dhe ishin dënuar me nga një vit burgim.
Nga akuza janë liruar Agim Çeku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari.
Apeli ka konstatuar se nuk është provuar se të akuzuarit e kanë kryer veprën penale të keqpërdorimit të pozitës apo autoritetit zyrtar në bashkëkryerje.
Njëkohësisht, Gjykata e Apelit ka refuzuar si të pabazuar ankesën e Prokurorisë Speciale kundër lirimit të Nuredin Lushtakut dhe Smajl Elezajt. Këta të fundit ishin liruar nga akuza që në shkallën e parë.
Në këtë mënyrë, të gjithë 12 personat e përfshirë në këtë proces janë liruar nga akuzat. Vendimi është raportuar më 11 shtator, ndërsa aktgjykimi i Apelit mban datën 9 shtator 2026.
Prokuroria kërkonte dënime më të ashpra
Prokuroria Speciale kishte kërkuar që Nuredin Lushtaku dhe Smajl Elezaj të shpalleshin fajtorë, ndërsa ndaj dhjetë të dënuarve të tjerë të shqiptoheshin dënime më të larta.
Apeli ka ardhur në përfundim të kundërt: ankesa e Prokurorisë për pjesën liruese është refuzuar, ndërsa kërkesa për ashpërsimin e dënimeve ka mbetur pa objekt pas nxjerrjes së aktgjykimit lirues.
Shpenzimet e procedurës penale do të mbulohen nga mjetet buxhetore. Ministria e Punës dhe Mirëqenies Sociale është udhëzuar që kërkesën eventuale pasurore-juridike ta realizojë përmes një kontesti civil.
Për çfarë akuzoheshin?
Rasti lidhej me procesin e njohjes dhe verifikimit të statusit të veteranëve dhe kategorive të tjera të dala nga lufta e Ushtrisë Çlirimtare të Kosovës.
Sipas aktakuzës, të akuzuarit, si anëtarë të Komisionit Qeveritar, pretendohej se kishin tejkaluar kompetencat ose nuk i kishin përmbushur detyrat zyrtare, duke ua mundësuar personave të tjerë përfitimin e kundërligjshëm të statusit të veteranit.
Mbrojtja kishte kundërshtuar përgjegjësinë individuale të të akuzuarve dhe kishte argumentuar se verifikimi i aplikacioneve ishte zhvilluar në terren përmes strukturave dhe zinxhirit komandues të zonave operative.
Gjykata e Apelit përfundimisht ka konstatuar se nuk është provuar kryerja e veprës penale që u vihej në barrë të akuzuarve.
