Për më shumë se gjashtë dekada, një dyqan i vogël dhe i thjeshtë në Oxford Street fshehu një nga arkivat fotografike më të veçanta të kulturës pop: fotot e pasaportave të rreth 800 personazheve të famshëm. Tani, disa vite pas mbylljes së studios, ky koleksion intim po i prezantohet publikut përmes një libri të ri.
Biznesi familjar “Passport Photo Service”, i themeluar nga ish-boksieri Dave Sharkey dhe i trashëguar te djali i tij, Philip, njihej për shërbimin e shpejtë të ofruar nën sloganin “Gati për 10 minuta”. Falë vendndodhjes strategjike pranë një sërë ambasadash në Londër, para kamerave të tyre u ulën ikona të tilla si Muhammad Ali, Madonna, Sean Connery, Mick Jagger dhe Tilda Swinton.
Megjithatë, zhvendosja e ambasadës amerikane dhe bumi i zhvillimeve imobiliare në zonën luksoze të qytetit çuan në mbylljen e biznesit në vitin 2019. Për të ruajtur këtë trashëgimi të veçantë, Philip Sharkey publikoi së fundmi librin “Shërbimi i Fotove të Pasaportave”, i cili sjell për herë të parë mbi 300 portrete të shkrepura nga vitet 1950 deri në vitet 2010.
“Është një Londër në zhdukje e sipër,” shprehet Sharkey, duke kujtuar kohën kur një biznes i vogël artizanal mund të mbijetonte në rrugët kryesore të kryeqytetit britanik, diçka pothuajse e pamundur në ditët e sotme.
“Barazuesi i madh” i të famshmëve
Përtej vlerës nostalgjike, arkivi ofron një vështrim të rrallë e të pafiltruar të njerëzve më të fotografuar në botë. Sharkey e cilëson foton e pasaportës si “barazuesin e madh”. Ndryshe nga tapeti i kuq apo setet fotografike, yjet mbërrinin në studio kryesisht pa grimierë apo përfaqësues të marrëdhënieve me publikun.
Ai kujton raste të tilla si aktori Donald Sutherland, i cili mbërriti me nxitim nga Ambasada Kanadeze pa patur kohë as të hiqte pallton, apo Kate Winslet, e cila u fotografua në vitin 1997, vetëm pak muaj para se filmi “Titanic” ta kthente në një yll të përmasave globale. Edhe vetë yjet kishin kuriozitet; aktorja Angelina Jolie, gjatë vizitës së saj, kaloi kohë duke shfletuar “murin e famës” së dyqanit për të gjetur kolegët e saj.
Diskrecioni përtej studios
Për disa nga klientët më të rëndësishëm, si Madonna apo Sting, familja Sharkey ofronte shërbime në shtëpi apo në studiot e regjistrimit, duke u përshtatur me axhendat e tyre të ngjeshura.
Edhe pse libri zbulon qindra fytyra të njohura, arkivi i plotë mbetet i paprekur për publikun. Një numër i caktuar portretesh do të qëndrojnë përgjithmonë në kasafortë për shkak të marrëveshjeve të rrepta të konfidencialitetit, duke dëshmuar kështu besueshmërinë absolute që ky biznes i vogël londinez i ofroi elitës botërore për më shumë se një gjysmë shekulli.
