Policia e Kosovës ka arrestuar një person si të dyshuar për mashtrim’, ‘falsifikim të dokumenteve’ dhe ‘legalizim i përmbajtjes së rreme’.
Sipas PK, i dyshuari B.L, 36-vjeç dyshohet se bashkë me disa persona kanë tjetërsuar një pronë në Ferizaj në vlerë tre milionë euro.
“Ekziston dyshimi i bazuar se personat e dyshuar, duke falsifikuar dokumentet e identifikimit dhe certifikatën e pronës së palës ankuese, kanë arritur të tjetërsojnë në mënyrë të kundërligjshme pronën e tij me sipërfaqe prej shtatë hektarësh në vlerë të përafërt të tregut rreth Tre (3) milion euro e cila gjendet në komunën e Ferizajt, të cilën më pas e kanë parcelizuar dhe shitur personave të tretë”, thuhet në komunikatë.
Bëhet e ditur se me urdhër për kontroll, është kryer bastisje në një lokacion, ku janë gjetur dhe konfiskuar një telefon mobil dhe dokumente që ndërlidhen me rastin, ndërsa pas intervistimit, me urdhër të prokurorit i dyshuari ndalohet për 48 orë.
Lidhur me këtë rast, me datën 19 shkurt 2026 Policia e Kosovës kishte arrestuar dhe dërguar në mbajtje edhe katër persona tjerë të cilët në bashkëkryerje dyshohet se kanë kryer veprat e lartcekura./teve1.info/
