Nga portretet e fejesës që ngjallnin kuriozitet mbretëror deri te dërgimi i trëndafilave të fshehur nëpër tuba në klube nate të Berlinit të viteve ’20, njerëzit e kanë perfeksionuar artin e komunikimit romantik në mënyrë të tërthortë.
Historia dëshmon se shumë përpara epokës së aplikacioneve të takimeve dhe “swipe”-eve, flirtimi mbështetej në kode, dhurata dhe gjuhë të heshtur, duke ndërtuar ura emocionale përtej fjalëve.
Në periudhën e Rilindjes, një portret i realizuar nga Hans Holbein i ri ishte i mjaftueshëm që mbreti Henri VIII të fejohej me Anne of Cleves – edhe pse martesa zgjati vetëm gjashtë muaj. Në epokën Regency, gratë përdornin tifot si mjete flirtimi nëpër ballo, ndërsa dërgonin mesazhe të koduara përmes lëvizjeve të duarve në distancë. Në të njëjtën kohë, parfume, libra me nënvizime dhe dhurata të vogla përçonin ndjenja dashurie dhe përputhshmërie emocionale.
Me përhapjen e fotografisë në epokën Viktoriane, portretet në kartolina të vogla – cartes de visite – u bënë mjetet e para “virale” për të prezantuar veten dhe për të tërhequr një partner të mundshëm, ashtu si profilet në aplikacionet moderne. Simbolika dhe kujdesi në përzgjedhjen e sfondit apo veshjes ishin po aq të rëndësishëm sa dhe një “bio” sot.
Në klubet e Berlinit të viteve 1920, flirtimi u përfshi në teknologji moderne. Klubi legjendar Residenz-Casino ofronte një sistem tubash pneumatikë, përmes të cilëve njerëzit dërgonin letra, dhurata – madje edhe kokainë – për të shprehur interes romantik në mënyrë të rafinuar por intriguese.
Në komunitetet LGBTQ+, simbolika e fshehur ishte jetike për mbijetesë dhe lidhje. Nga karafili i gjelbër i Oscar Wilde, te ngjyrat e lavandës dhe aksesorët e veçantë, këto sinjale ofronin një mënyrë të heshtur për të gjetur dashurinë në kohë shtypjeje.
Edhe në epokën dixhitale, kjo gjuhë e heshtur nuk ka vdekur. Aplikacionet e takimeve, profilizimi përmes fotografive, emojit e zgjedhur me kujdes dhe tekstet e koduara janë thjesht evolucion i po atij nevojë njerëzore për të ndarë dëshirat, për të flirtuar dhe për të krijuar intimitet. Në thelb, edhe pse format ndryshojnë, loja e dashurisë mbetet po aq magjepsëse dhe komplekse sa ka qenë gjithmonë./ BBC – Syri.Net
