Alpet evropiane po përjetojnë një bum të ri në tregun e pasurive të paluajtshme, ndërsa kërkesa për prona malore vijon të rritet ndjeshëm si në dimër, ashtu edhe gjatë verës. Sipas raportit të fundit të firmës ndërkombëtare të pasurive të paluajtshme Knight Frank, Indeksi i Pronave Alpine është rritur me 3.3% nga viti në vit deri në qershor 2025, duke reflektuar një interes të qëndrueshëm për jetesë luksoze në zemër të Alpeve.
Në pesë vitet e fundit, ky treg ka përjetuar një rritje totale prej 23%, që sipas ekspertëve tregon “një epokë të re për jetën alpine”. Ndër faktorët kryesorë që kanë nxitur këtë trend janë punësimi në distancë, dëshira për jetesë të përhershme në mal dhe kërkesa e shtuar për prona me akses gjatë gjithë vitit.
Në krye të listës qëndron Andermatt në Zvicër, me një rritje vjetore rekord prej 14.6%, ndikuar nga fakti se është e përjashtuar nga kufizimet e ligjeve zvicerane Lex Weber dhe Lex Koller, të cilat kufizojnë pronësinë e huaj dhe shitjet e shtëpive të dyta. “Këto përjashtime kanë gjeneruar një interes të jashtëzakonshëm ndërkombëtar,” tha Kate Everett-Allen nga Knight Frank.
Pas Andermatt renditet Davos me një rritje prej 10.5%, ndërsa Cortina d’Ampezzo në Itali zë vendin e tretë, me një rritje prej 10%, të ndikuar ndjeshëm nga përgatitjet për Lojërat Olimpike Dimërore 2026.
Nga ana tjetër, resortet franceze kanë shënuar rritje më të moderuar. Méribel dhe St. Moritz barazohen me 7.1%, ndërsa Megève ka pësuar rënie me 4.3%, duke treguar kontraste të forta brenda tregut alpin.
Në aspektin e çmimeve, diferencat janë të mëdha: nga 9,300 euro për metër katror në Morzine deri në 47,300 euro në Gstaad, me një mesatare prej 19,675 euro në 26 resortet e analizuara. Zvicra vijon të mbajë epërsinë ndaj Francës, me një rritje mesatare vjetore prej 5% kundrejt 1.2% të tregut francez.
Sipas Knight Frank, 73% e milionerëve të anketuar do të konsideronin jetesën e përhershme në Alpe, të shtyrë nga fleksibiliteti i punës, fokusi në mirëqenie dhe dëshira për lidhje më të fortë me natyrën. Pjesa më e madhe e tyre, rreth 44%, synojnë prona nën 2 milionë euro, duke treguar se Alpet po bëhen tërheqëse jo vetëm për super të pasurit, por edhe për investitorë me buxhet më të përmbajtur.
Ky trend, sipas analistëve, tregon se pas pandemisë, jetesa malore nuk është më thjesht një modë kalimtare, por një zgjedhje e qëndrueshme për shumë evropianë që kërkojnë luks, siguri dhe qetësi në zemër të natyrës.
