Britney Spears rrëfen në librin e saj të kujtimeve, që do të publikohet së shpejti, se ajo kreu një abort për t’i dhënë fund shtatzënisë nga ylli i popit, Justin Timberlake, ndërsa të dy ishin në lidhje në fund të viteve 1990 dhe fillim të viteve 2000, sipas fragmenteve të publikuara të martën në revistën People.
Spears, 41, kujtoi në autobiografinë e saj, “The Woman in Me”, se shtatzënia “ishte një surprizë”, por ajo donte ta mbante fëmijën dhe pranoi t’i nënshtrohej një aborti vetëm me insistimin e Timberlake.
“E doja shumë Justinin. Gjithmonë prisja që një ditë të kishim një familje së bashku,” shkroi Spears. “Por Justin definitivisht nuk ishte i lumtur për shtatzëninë. Ai tha se ne nuk ishim gati të kishim një fëmijë në jetën tonë, se ishim shumë të rinj. ”
Po të ishte vetëm vendimi i saj, Spears shkroi: “Nuk do ta kisha bërë kurrë. E megjithatë Justin ishte aq i sigurt se nuk donte të bëhej baba”. Ajo e përshkroi episodin si “një nga gjërat më të dhimbshme që kam përjetuar ndonjëherë në jetën time”.
Përfaqësuesit e Timberlake, 42, nuk iu përgjigjën kërkesës së Reuters për një koment.
Timberlake dhe Spears, të cilët u takuan si anëtarë të rinj të kastit në televizionin “The Mickey Mouse Club”, ishin të lidhur për rreth tre vjet në fund të adoleshencës dhe në fillim të të 20-tave, duke u bërë sensacione të tabloideve, përpara se të ndaheshin papritur në 2002.
Spears u pyet pa pushim në media për virgjërinë e saj, ndërsa Timberlake tha se kishte fjetur me të dhe më pas publikoi një këngë, “Cry Me a River”, në të cilën ai la të kuptohej se ajo e kishte tradhëtuar gjatë marrëdhënies së tyre.
NewsBomb
