Një zhvillim i ndodhur vetëm pak ditë përpara se videot private të lidhura me Adrian Hilën të nisnin të qarkullonin në rrjet po rikthehet tashmë në vëmendje.
Më 28 shtator, kompozitori ishte i pranishëm në Komisionin e Kulturës, ku ngriti shqetësime lidhur me mënyrën se si administrohen të ardhurat nga të drejtat e autorit për artistët.
Gjatë fjalës së tij, Hila paraqiti edhe shifra për të ardhurat e mbledhura ndër vite, ndërsa kritikoi sistemin aktual të administrimit të tyre. Sipas tij, mënyra se si funksionon ky mekanizëm sjell humbjen e një pjese të konsiderueshme të parave gjatë ndërmjetësimit.
Kompozitori deklaroi se sistemi aktual “nuk funksionon” dhe kërkoi ndryshime në mënyrën e menaxhimit dhe shpërndarjes së të ardhurave që u takojnë autorëve dhe artistëve.
Vetëm pak ditë pas kësaj daljeje, në rrjetet sociale nisën të shpërndaheshin materiale private që e vendosën Hilën në qendër të vëmendjes publike dhe që tashmë janë bërë objekt verifikimesh nga autoritetet.
Afërsia në kohë mes dy ngjarjeve ka bërë që në rrjet të ngrihen pikëpyetje rreth momentit kur materialet u publikuan. Megjithatë, deri tani nuk është bërë publike asnjë provë që të tregojë se shpërndarja e videove lidhet me deklaratat e Hilës në Komisionin e Kulturës.
Për këtë arsye, çdo pretendim për një lidhje mes dy ngjarjeve mbetet në nivel aludimi, për sa kohë nuk mbështetet nga të dhëna apo konstatime të autoriteteve.
/Revista Ora
