E po, momenti më në fund ka ardhur, Brooklyn Beckham dhe Nicola Peltz Beckham mund të bëjnë një dokumentar që zbulon detaje mbi dramën e tyre familjare me David, Victoria, Cruz dhe Romeo Beckham.
Sipas raportimeve të Daily Mail, çifti është në bisedime për një dokumentar të tyre në Hulu. Nëse platforma arrin atë që dëshiron, ky dokumentar mund t’u japë Brooklyn-it dhe Nicola-s mundësinë të flasin për tensionet e tyre me familjen Beckham.
Sipas këtij burimi, Brooklyn “mund të jetë gati të zbulojë konfliktin familjar” dhe kjo do ta vendoste atë në konkurrencë të drejtpërdrejtë me prindërit e tij, Victoria dhe David, të cilët kanë publikuar gjithashtu seriale të tyre me platformën Netflix.
Brooklyn, i cili thuhet se është “i interesuar” për projektin, ka më shumë gjasa të flasë për sipërmarrjet e tij në fushën e kulinarisë, por Hulu gjithashtu shpreson që ai të zbulojë detaje mbi konfliktin me familjen e tij.
Megjithëse përmbajtja e këtij dokumentari nuk është konfirmuar ende nga Hulu dhe mbetet e paqartë, është shumë e mundshme që Brooklyn të ketë shumë për të thënë rreth konfliktit familjar me prindërit dhe vëllezërit e tij. Për kujtesë, Brooklyn publikoi një deklaratë të bujshme në janar lidhur me pretendimet se David dhe Victoria po përpiqeshin të dëmtonin marrëdhënien e tij me Nicola-n.
Në atë deklaratë, ai tha:
“Prindërit e mi janë përpjekur vazhdimisht të prishin marrëdhënien time që para dasmës dhe kjo nuk ka ndalur. Nëna ime anuloi në momentin e fundit punimin e fustanit të Nicola-s, pavarësisht sa e emocionuar ishte ajo ta vishte dizajnin e saj, duke e detyruar të gjente urgjentisht një fustan tjetër.
Javë para ditës sonë të madhe, prindërit e mi më ushtruan vazhdimisht presion dhe u përpoqën të më bindnin që të hiqja dorë nga të drejtat mbi emrin tim, gjë që do të ndikonte tek unë, bashkëshortja ime dhe fëmijët tanë të ardhshëm. Ata këmbëngulnin që ta nënshkruaja para datës së dasmës, sepse atëherë kushtet e marrëveshjes do të hynin në fuqi. Refuzimi im ndikoi në pagesën dhe ata nuk më kanë trajtuar kurrë njësoj që atëherë.
Gjatë planifikimit të dasmës, nëna ime madje më quajti ‘të lig’ sepse unë dhe Nicola vendosëm të përfshinim në tavolinën tonë dado Sandra-n dhe dadon e Nicola-s, pasi të dyja nuk kishin bashkëshortët e tyre. Të dy prindërit tanë kishin tavolinat e tyre të vendosura në mënyrë të barabartë pranë tonës.”
Deklarata e Brooklyn-it gjithashtu zbuloi se Victoria ftoi persona nga e kaluara e tij që ai nuk dëshironte në dasmë dhe kërceu me të në mënyrë të papërshtatshme gjatë asaj që supozohej të ishte vallëzimi i parë si çift i martuar.
Ai gjithashtu mohoi thashethemet se Nicola kontrollon veprimet e tij dhe e përfundoi deklaratën duke thënë:
“Kam qenë i kontrolluar nga prindërit e mi për pjesën më të madhe të jetës sime. Jam rritur me ankth të madh. Për herë të parë në jetën time, që kur u largova nga familja ime, ai ankth është zhdukur.”
Si David ashtu edhe Victoria i kanë shtrirë dorën e pajtimit Brooklyn-it duke i uruar ditëlindjen më herët këtë muaj, por tensionet fatkeqësisht mbeten ende mes tij dhe prindërve.
