Duke pasur parasysh sezonin e dimrit, ekziston gjithashtu një kërcënim më i madh i infektimit me grip ose viruse tjera.
Sipas Institutit Kombëtar të Shëndetësisë (NIH), virusi i gripit sezonal vetëm në SHBA shtron në spital më shumë se 200.000 njerëz dhe vret mbi 36.000 njerëz çdo vit. Simptomat e zakonshme të gripit përfshijnë temperaturë, kollë, lodhje, të dridhura dhe dhimbje muskujsh, ndërsa komplikimet mund të çojnë në kushte kërcënuese për jetën, si pneumonia.
Ndërsa sezonet e kaluara të gripit dhe pandemia COVID-19 na kanë mësuar se si të qëndrojmë të shëndetshëm dhe të kemi kujdes të shtuar me higjienën, siç është larja e zellshme e duarve, ka ende shumë vende ku shanset tuaja për ta marrë këtë virus janë dukshëm më të larta.
Shkollat dhe kopshtet
Shkollat dhe kopshtet njihen për sëmundjet qarkulluese dhe gripi nuk bën përjashtim. Rrethet e afërta, furnizimet e përbashkëta dhe ndërveprimet e nxënësve krijojnë një mjedis të favorshëm për transmetimin e gripit. Të gjithë fëmijët kanë lodra të përbashkëta, shumë aktivitete në grup dhe ka shumë mikrobe në këtë grupmoshë.
Inkurajimi i larjes së rregullt të duarve, promovimi i vaksinimit dhe informimi për epidemitë e gripit në komunitet, janë hapa kyçë në mbrojtjen e nxënësve dhe mësuesve.
Transporti publik
Pavarësisht nëse jeni në autobusë, trena apo taksi, turmat dhe sipërfaqet me prekje të lartë e bëjnë më të mundshëm që të kapeni nga gripi. Kontakti i ngushtë me pasagjerët dhe ulja në të njëjtat ulëse pa i pastruar ato midis pasagjerëve, rrit ndjeshëm rrezikun e infektimit.
Distanca sociale kur është e mundur dhe përdorimi i dezinfektuesve të duarve, mund t’i ndihmojë udhëtarët ta zvogëlojnë rrezikun e tyre për t’u prekur nga gripi.
Zyrat dhe vendet e punës
Nuk është sekret që hapësirat e zyrave dhe stacionet e përbashkëta të punës mund të jenë pika të nxehta të mundshme për viruset dhe bakteret. Ju punoni ngushtë me të tjerët në punë, që do të thotë se jeni në afërsi dhe shpesh ndani hapësira të tilla, si dhomat e takimeve dhe pushimeve.
Pastrimi i zonave të përbashkëta rregullisht, ofrimi i opsioneve të largimit kur është e mundur dhe inkurajimi i punonjësve të sëmurë që të qëndrojnë në shtëpi, janë çelësi për krijimin e një vendi pune të mbrojtur nga gripi.
Palestra
Ndërsa qendrat e fitnesit dhe klasat e ushtrimeve në grup kanë për qëllim promovimin e një stili jetese të shëndetshëm, ato gjithashtu mund t’ju ekspozojnë ndaj gripit. Pajisjet e përbashkëta të stërvitjes dhe afërsia gjatë ushtrimeve, krijojnë një mjedis ku virusi i gripit mund të përhapet shpejt.
Fshirja e pajisjeve para dhe pas përdorimit dhe zgjedhja e një stërvitjeje më pak të ngarkuar mund t’ju ndihmojë ta mbani rutinën e fitnesit pa cenuar shëndetin tuaj.
Aeroplan dhe aeroport
Ndërsa udhëtimi në destinacione të reja është emocionues, aeroportet dhe aeroplanët mund të jenë baza për përhapjen e viruseve. Hapësirat e mbyllura dhe afërsia me bashkudhëtarët rrisin rrezikun e ekspozimit.
Praktikimi i higjienës së mirë të duarve, mbajtja e maskave dhe shmangia e prekjes së fytyrës, mund t’ju ndihmojë t’i zvogëloni shanset për t’u prekur nga gripi gjatë udhëtimit.
Restorante dhe kafene
Të shijosh një vakt ose një pushim kafeje në hapësira publike, do të thotë ekspozim ndaj enëve, menyve dhe tavolinave të përbashkëta. Gjithashtu, natyra sociale e ngrënies jashtë, rrit rrezikun e ekspozimit të mundshëm ndaj gripit. Shpesh jeni në hapësira të vogla të mbyllura në restorante ose kafene dhe për më tepër, jeni duke përdorur artikuj të përbashkët, si menytë dhe erëzat, kështu që mund të prekni sipërfaqen e diçkaje me virusin në të.
Për të zbutur këtë rrezik, zgjidhni ulëset në natyrë, mbani higjienën e duarve para dhe pas ngrënies dhe shmangni erëzat e përbashkëta.
Koncerte apo ngjarje sportive
Koncertet e mbushura me njerëz dhe ngjarjet sportive mund të jenë emocionuese, por ambientet e afërta dhe ambientet e përbashkëta mund ta rritin rrezikun e gripit. Për shkak të numrit të madh të njerëzve në një hapësirë të caktuar në një kohë të caktuar, koncertet dhe ngjarjet sportive janë vende me rrezik të lartë gripi – shkruan Eat This, Not That!.
Herën tjetër që do të merrni pjesë në një eveniment të tillë, merrni parasysh të mbani një maskë, të praktikoni një higjienë të shkëlqyer dhe të zgjidhni vendet që lejojnë distancimin shoqëror për të ulur shanset për t’u prekur nga gripi.
Spitalet dhe objektet e kujdesit shëndetësor
Fluksi i vazhdueshëm i pacientëve, pajisjet e përbashkëta mjekësore dhe ndërveprimet e ngushta mes mjekëve dhe infermierëve, rrisin ndjeshëm rrezikun e prekjes nga virusi i gripit. Për shkak të numrit të njerëzve të sëmurë rreth jush, ju keni më shumë gjasa të ekspozoheni ndaj gripit në spitale dhe objekte të kujdesit shëndetësor
Larja e shpeshtë e duarve dhe vaksinimet janë masa thelbësore si për punonjësit e kujdesit shëndetësor, ashtu edhe për pacientët dhe vizitorët.
Qendra tregtare
Sipërfaqet me prekje të lartë të qendrave tregtare dhe atmosfera plot zhurmë, janë baza për transmetimin e gripit. Qendrat tregtare janë zona me trafik të lartë që nuk pastrohen pas çdo personi. Shumë njerëz i vizitojnë ato çdo ditë, kështu që shanset janë që të ecni pranë ose të prekni të njëjtën sipërfaqe si dikush që mund të jetë i infektuar.
Dyqane ushqimore dhe barnatore
Karrocat e përbashkëta të blerjeve dhe sportelet e arkave, janë pikat e mundshme të gripit. Shumica e njerëzve ende priren të shkojnë në pazare ushqimore edhe kur janë të sëmurë, sepse ata ende kanë nevojë për ushqim dhe shpesh duhet të ndalen për të marrë ilaçe.
Për t’ju ndihmuar të zvogëloni shanset për t’u prekur nga gripi, dezinfektoni rregullisht duart, shmangni prekjen e fytyrës gjatë blerjeve dhe përdorni peceta dezinfektuese në dorezat e karrocave.
