“Seksi – disa herë në javë – ka qenë gjithmonë një ‘ngjitës’ i rëndësishëm në martesën tonë,” thotë Sara Chaudary, e cila është me bashkëshortin e saj, Arionin, prej 17 vitesh. “Por pati mbrëmje tepër të vështira, kur fillonim të bënim seks por nuk mund ta përfundonim. Si pasojë, ai ndaloi së iniciuari seksin dhe më refuzonte edhe kur përpiqesha ta filloja unë. Kjo thjesht nuk ishte normale për ne.”
Dysfunksioni erektil (ED) – paaftësia për të arritur ose mbajtur një ereksion të mjaftueshëm për një akt seksual të kënaqshëm – mbetet një nga kushtet mjekësore më të vështira për t’u diskutuar nga burrat. Por për miliona njerëz në mbarë botën, kjo nuk është aspak e rrallë – veçanërisht kur futet në lojë diabeti.
Për pronarët e një restoranti në West Yorkshire, Sara, 36 vjeç, dhe Arioni, 45 vjeç, problemet në dhomën e gjumit nisën pak pasi Arioni u diagnostikua me diabet të tipit 2 në moshën 43-vjeçare.
Ai nuk është i vetmi. Në Mbretërinë e Bashkuar, më shumë se 4.3 milionë njerëz jetojnë me diabet, me rreth 90% të rasteve të tipit 2, si rasti i Arionit. Sipas organizatës Diabetes UK, ED është më e zakonshme te burrat më të moshuar me diabet të tipit 2 dhe ata që jetojnë me obezitet, megjithatë ajo mund të ndikojë te burrat e çdo moshe me çdo lloj diabeti. Deri në 75% e burrave me diabet do të përjetojnë në një moment një formë të dysfunksionit erektil, dhe besohet se simptomat tek meshkujt diabetikë shfaqen 10-15 vjet më herët se tek burrat e tjerë.
“Është një nga ndërlikimet më të zakonshme të sëmundjes – por gjithashtu një nga më pak të diskutuara,” thotë profesori David Ralph, urolog konsultant në University College London.
“Shumë burra ndihen në siklet kur më takojnë – termi ‘dysfunksion erektil’ rrallë del nga goja e tyre. Në vend të kësaj thonë gjëra si: ‘nuk është si më parë, doktor’ ose ‘nuk funksionon siç duhet atje poshtë’. Ka shpesh një ndjenjë që e kanë zhgënjyer veten ose partneren,” thotë profesori Ralph.
“Është detyra ime të shpjegoj se ED është tepër i zakonshëm – veçanërisht me moshën dhe sëmundje të tjera si diabeti – dhe se është një çështje mjekësore, jo një dështim personal.”
Pse ndodh kjo? Sipas profesorit Ralph, niveli i lartë i sheqerit në gjak për një kohë të gjatë mund të dëmtojë enët e vogla të gjakut dhe nervat që janë thelbësorë për një ereksion. “Kjo zvogëlon qarkullimin e gjakut dhe ndjeshmërinë në penis. Burrat me diabet gjithashtu kanë më shumë gjasa të kenë nivele të ulëta të testosteronit, gjë që ul edhe më shumë dëshirën seksuale,” shton ai.
Ai gjithashtu thekson se faktorët psikologjikë, si ankthi ose depresioni, mund ta përkeqësojnë problemin. Ndërkohë, problemet e tjera shëndetësore të lidhura me diabetin, si sëmundjet e zemrës ose veshkave, mund të luajnë gjithashtu një rol në uljen e dëshirës seksuale dhe në shkaktimin e problemeve me ereksionin.
Një diagnozë në mes të jetës që ndryshoi martesën
Sara dhe Arioni u takuan për herë të parë në vitin 2008, u shpërngulën bashkë brenda dy muajve dhe mirëpritën fëmijën e tyre të parë një vit më vonë. Por romanca e tyre e furishme i rezistoi kohës – ata u martuan dhe sollën në jetë pesë djem, që sot janë 16, 14, 12, nëntë dhe tre vjeç.
“Pas kaq shumë vitesh së bashku e dimë që seksi nuk është gjithçka – por është padyshim një lidhje shumë e rëndësishme për ne, dhe do të thosha se kishim marrëdhënie seksuale tre deri në katër herë në javë,” thotë Sara, e cila ndihmon në drejtimin e restorantit të Arionit. “Duke pasur shoqe që nuk kanë pasur kurrë pasion të qëndrueshëm në marrëdhëniet e tyre, ne gjithmonë jemi ndjerë me fat në këtë drejtim.”
Një kontroll rutinë para disa vitesh tregoi se Arioni ishte në fazën paradiabetike. “Diabeti është më i përhapur në komunitetin e Azisë Juglindore, dhe në profesionin tim jam vazhdimisht i rrethuar nga chapati, naan dhe ne gatuajmë me gjalpë (ghee) – e pranoj që nuk është ideale për nivelin e insulinës,” thotë ai.
Sipas profesorit Ralph, paradiabeti është një ‘sinjal paralajmërues’ dhe veprimi i menjëhershëm – si ndryshimi i stilit të jetesës dhe humbja në peshë – mund të minimizojnë rreziqet duke mbajtur nën kontroll nivelin e sheqerit në gjak.
