Tremori është veçanërisht i theksuar te racat me qime të holla dhe pak yndyrë trupore, si Chihuahua, duke i bërë më të ndjeshëm ndaj të ftohtit edhe në temperatura relativisht të buta. Sipas portalit The Spruce Pets, ndonëse dridhja e herëpashershme është normale, është e rëndësishme të dallohet kur ajo bëhet shenjë alarmi dhe kërkon ndërhyrjen e veterinerit.
Ekspertët theksojnë se pronarët duhet të jenë të vëmendshëm nëse dridhjet ndërhyjnë në aktivitetet e përditshme të qenit, shfaqen papritur ose shoqërohen me simptoma si të vjella apo lodhje. Sipas Danas.rs, në këto raste është e domosdoshme një konsultë me veterinerin për të përjashtuar sëmundje apo probleme të tjera fizike.
Edhe pse disa qen fillojnë të ndiejnë të ftohtë që në 10 deri në 15 gradë Celsius, veçanërisht në kushte të lagështa, dridhjet që nuk ndalen pas ngrohjes së kafshës mund të sinjalizojnë një problem shëndetësor. Po ashtu, dridhjet e forta që përkeqësohen në situata stresuese mund të tregojnë sindromën e dridhjes, një gjendje që kërkon trajtim profesional.
Ekspertët kujtojnë se dridhjet mund të jenë edhe shenjë e dhimbjes ose lëndimit, veçanërisht nëse vërehen pas shëtitjeve të gjata ose gjatë prekjes së një zone të dhimbshme. Ndërkohë, emocionet e forta si frika, ankthi apo edhe gëzimi mund të shkaktojnë dridhje të përkohshme, të cilat mund të menaxhohen me ndihmën e një specialisti të sjelljes së kafshëve.
Në raste më të rënda, dridhjet mund të jenë simptomë e sëmundjeve serioze ose e helmimeve, që kërkojnë ndërhyrje të menjëhershme veterinare. Gëlltitja e toksinave është ndër shkaqet më të rrezikshme, dhe çdo dyshim për helmim duhet trajtuar urgjentisht.
Për parandalim, këshillohet që qentë të mbahen ngrohtë, në një mjedis të qetë dhe të sigurt, larg substancave të rrezikshme. Megjithatë, disa racave u mungon aftësia për t’i shmangur plotësisht dridhjet për shkak të predispozitave gjenetike.
