Një analizë e ekspertëve ka nxjerrë në pah disa nga pickimet më të dhimbshme në botën shtazore, duke përfshirë insekte, kandila deti dhe krijesa të tjera helmuese. Edhe pse shumë prej tyre nuk janë domosdoshmërisht vdekjeprurëse, dhimbja që shkaktojnë konsiderohet ekstreme dhe shpesh krahasohet me forma të rënda torture.
Në krye të listës për insektet qëndron puna e entomologut Justin Schmidt, i cili krijoi një indeks me katër nivele për të matur dhimbjen e pickimeve, pasi testoi mbi 90 specie të ndryshme. Në nivelin më të lartë, atë të katërt, ai përfshiu vetëm disa specie, si milingona “plumb”, grerëza “tarantula hawk” dhe grerëza luftëtare. Pickimi i milingonës “plumb”, për shembull, përshkruhet si një dhimbje e pastër dhe intensive që mund të zgjasë deri në 24 orë.
Pas vdekjes së Schmidt në vitin 2023, eksperimenti u vazhdua nga eksploruesi dhe krijuesi i përmbajtjes Coyote Peterson, i cili u pickua qëllimisht nga dhjetëra specie për të dokumentuar efektet e tyre.
Ai shtoi në listën e pickimeve më të dhimbshme edhe hornetin gjigant japonez, i cili sipas tij shkakton një goditje të menjëhershme dhe shpërthyese dhimbjeje, si dhe grerëzën “ekzekutuese”, që ai e konsideron si më të keqen, për shkak të dhimbjes së gjatë dhe dëmtimit të indeve që mund të lërë shenja të përhershme në lëkurë.
Megjithatë, insektet nuk janë të vetmet që shkaktojnë dhimbje ekstreme. Në botën detare, kandilat e detit janë ndër më të rrezikshmit. Veçanërisht i frikshëm është kandili Irukandji, një krijesë shumë e vogël, pickimi i të cilit shpesh kalon pa u vënë re në fillim, por më pas shkakton simptoma të rënda si dhimbje të forta në trup, djersitje intensive, të vjella dhe spazma. Në raste të rralla, sindroma e tij mund të çojë edhe në komplikime serioze si probleme kardiake apo hemorragji.
Ndër krijesat e tjera detare të rrezikshme përmenden kandili “box jellyfish”, i konsideruar ndër më vdekjeprurësit në botë, krimbi i zjarrit që shkakton djegie të forta për orë të tëra dhe peshku “stonefish”, i cili përmes gjembave helmues mund të shkaktojë dhimbje që zgjasin deri në 48 orë dhe ënjtje të konsiderueshme.
