Këngëtarja nga Prizreni, Fjolla Gashi, po e vazhdon rrugëtimin e saj në muzikë me projekte që i dedikohen dashurisë dhe atmosferës së festave familjare. Nënë e dy fëmijëve dhe artiste e formuar profesionalisht, ajo ka përfunduar studimet bachelor dhe master në Universitetin e Prishtinës në degën e këndimit. Rrugëtimi i saj artistik ka nisur që në moshën 14-vjeçare, duke e shndërruar pasionin për muzikën në një profesion të mirëfilltë.
Megjithëse ka një formim akademik në muzikë, Fjolla thotë se vendi ku ajo ndihet më autentike është skena e dasmave. Sipas saj, pikërisht aty ajo arrin të jetë vetvetja, pranë njerëzve që festojnë momentet më të rëndësishme të jetës. Me energjinë e saj të natyrshme dhe komunikimin e drejtpërdrejtë me dasmorët, atmosfera e dasmave është hapësira ku ajo e ndan më së miri energjinë pozitive me publikun.
Projekti më i ri i këngëtares mban titullin “Gëzuar Dashni”, një këngë e krijuar posaçërisht për çiftet e reja dhe për ata që duan t’i shprehin ndjenjat e tyre përmes muzikës. Me këtë projekt, Fjolla synon që kënga të bëhet pjesë e momenteve të veçanta në dasma, duke i shoqëruar çiftet teksa vallëzojnë dhe festojnë dashurinë e tyre.
Teksti i këngës rrëfen historinë e një dashurie që nis me emocionet e para dhe kulmon me fjalët më të thjeshta, por më domethënëse: “Të dua”. Refreni “Gëzuar dashni, jeta ime je vetëm ti” është menduar të mbetet gjatë në veshin e publikut, ndërsa vetë këngëtarja shpreson që kjo këngë të kthehet në një kolonë zanore të dashurisë për shumë çifte në sallat e dasmave.
