1
Që nga muaji prill, Komuna e Prishtinës ka dërguar shkresa të njëpasnjëshme në Ministrinë e Financave për alokimin e mjeteve që me ligj i takojnë Kryeqytetit.
Asnjë përgjigje.
Asnjë reagim.
Asnjë gatishmëri për zgjidhje.
Ndërkohë, kriza financiare në Kryeqytet po thellohet çdo ditë – po rrezikohen pagat e punëtorëve, funksionimi i ndërmarrjeve publike, shërbimet komunale, subvencionet për kategoritë më të ndjeshme të shoqërisë sonë dhe vazhdimi i projekteve kapitale.
Por Ministria, në vend që të përmbushë detyrimin e saj ligjor ndaj Kryeqytetit, ka zgjedhur të heshtë me qëllim, duke bllokuar alokimin e fondeve vetëm për ta vënë në pozitë të vështirë Kryetarin Përparim Rama dhe Lidhjen Demokratike të Kosovës në prag të zgjedhjeve.
Ky është abuzim i pastër me pushtetin shtetëror dhe përdorim politik i buxhetit publik – një përpjekje e ulët për ta goditur Kryeqytetin përmes pengimit të punës së tij.
Ndërkohë që qytetarët e Prishtinës përballen me pasoja reale të kësaj bllokade, ministri i financave merret me shpifje dhe manipulime, duke tentuar që përmes propagandës së rrejshme të “kontribuojë” sadopak në fushatën e kandidatit të partisë së tij.
Kjo sjellje është e papranueshme, e dëmshme dhe thellësisht e papërgjegjshme.
Prishtina nuk do të gjunjëzohet për shkak të kalkulimeve elektorale të askujt.
Qytetarët e Kryeqytetit e dinë mirë kush po punon dhe kush po bllokon!
