Presidenti i Venezuelës, Nicolás Maduro, raportohet se është arrestuar në orët e para të mëngjesit gjatë një operacioni të forcave speciale amerikane, bashkë me gruan e tij. Sipas burimeve, ndërhyrja është kryer nga Delta Force, njësia elitare e ushtrisë së SHBA-së e specializuar në misione të nivelit më të lartë të sigurisë.
Operacioni ka tronditur Venezuelën dhe ka shkaktuar reagime të menjëhershme ndërkombëtare, ndërsa Maduro thuhet se është nxjerrë nga vendi pas kapjes së tij. Zhvillimi po përshkruhet si një nga ndërhyrjet më dramatike ushtarake të dekadave të fundit, i krahasuar nga analistët me operacione historike si ai kundër Osama bin Laden apo arrestimi i Saddam Husseinit.
Nick Paton Walsh, korrespondent amerikan për sigurinë ndërkombëtare, e cilësoi ndërhyrjen si “një moment tronditës” dhe theksoi se bëhet fjalë për veprimin më të fortë ushtarak të administratës Trump deri tani. Sipas tij, fakti që Maduro, një lider i mbështetur hapur nga Rusia dhe Kina, u kap në kryeqytetin e tij gjatë natës nga forcat amerikane, tregon nivelin e vendosmërisë dhe lirisë së veprimit që Shtetet e Bashkuara po demonstrojnë në skenën globale.
Delta Force konsiderohet maja e operacioneve speciale amerikane. Njësia është e specializuar në kundërterrorizëm, shpëtim pengjesh, neutralizimin e objektivave me rëndësi të lartë dhe misione sekrete në kushte ekstremisht të rrezikshme. Ajo vepron nën komandën e Joint Special Operations Command (JSOC) dhe ndërhyn zakonisht në situata shumë të ndjeshme, ku çdo gabim mund të ketë pasoja globale.
/tiranapost
