Flokët janë një nga elementët më të rëndësishëm të paraqitjes sonë, por shpesh, pa e kuptuar, i dëmtojmë me zakone të gabuara. Ja cilat janë disa nga gabimet më të shpeshta në kujdesin e përditshëm të flokëve:
1. Larja shumë e shpeshtë
Larja e përditshme mund të heqë vajrat natyralë të kokës, duke e bërë lëkurën dhe flokët të thatë e të brishtë. Idealja është larja 2-3 herë në javë, në varësi të tipit të flokëve.
2. Përdorimi i shampos së gabuar
Jo çdo shampo është e përshtatshme për çdo lloj floku. Zgjedhja e produkteve që nuk i përshtaten nevojave të flokëve tuaj mund të shkaktojë tharje, yndyrë të tepërt ose irritim të lëkurës së kokës.
3. Aplikimi i balsamit në rrënjë
Balsami duhet vendosur vetëm nga mesi i gjatësisë së flokëve deri në maja, pasi aplikimi në rrënjë mund t’i rëndojë flokët dhe t’i bëjë të duken pa jetë.
4. Tharja me temperaturë shumë të lartë
Përdorimi i tharëses me temperaturë maksimale dëmton strukturën e flokut, duke çuar në thyerje dhe majë të djegura. Përdorni opsionin e ngrohtë ose të ftohtë kur të jetë e mundur.
5. Krehja e flokëve të lagur me furçë të zakonshme
Flokët e lagur janë më të brishtë dhe më të ndjeshëm ndaj thyerjes. Përdorni një krehër me dhëmbë të gjerë për të zgjidhur flokët pas larjes.
6. Neglizhimi i mbrojtjes nga nxehtësia
Nëse përdorni piastra, tharëse ose lok, mbrojtja termike është thelbësore. Produktet mbrojtëse ndihmojnë në krijimin e një barriere që parandalon dëmtimin nga nxehtësia e lartë.
7. Lënia pas dore e prerjeve të rregullta
Edhe nëse dëshironi flokë të gjatë, prerja e majave çdo 2-3 muaj është e rëndësishme për të shmangur ndarjen dhe dobësimin e flokëve.
