Një person rreth 55-vjeç është gjetur pa shenja jete në një dyqan në rajonin e Mitrovicës, gjatë natës.
Lajmin e ka konfirmuar zëdhënësi i policisë për rajonin e Mitrovicës, Avni Zahiti.
Sipas tij, Policia është njoftuar për rastin rreth orës 00:17, ndërsa nga veprimet fillestare hetimore në vendin e ngjarjes janë ngritur dyshimet se rasti ka elemente të vetëvrasjes.
”Bazuar në të dhënat dhe veprimet fillestare hetimore në vendin e ngjarjes, dyshimet e para janë ngritur për rast me elemente të vetëvrasjes. Në vendin e ngjarjes është gjetur dhe konfiskuar një armë zjarri. Me vendim të prokurorit, trupi i pajetë i viktimës është dërguar në Institutin e Mjekësisë Ligjore (IML), për obduksion”, ka thënë Zahiti.
Ndërkohë, hetuesit policorë, në koordinim me prokurorin kompetent, kanë nisur hetimet për të sqaruar plotësisht rrethanat e rastit.
