Për herë të parë në Bashkimin Evropian, rregullatori gjerman i barnave ka miratuar përdorimin e psilocibinës – përbërësit aktiv në kërpudhat “magjike” – si terapi eksperimentale për pacientët me depresion të thellë që nuk i përgjigjen trajtimeve tradicionale.
Vendimi u jep mundësi një grupi të kufizuar pacientësh të marrin terapinë psikedelike në kushte të kontrolluara rreptësisht dhe me mbikëqyrje mjekësore, përmes një skeme të ashtuquajtur “përdorim me dhembshuri”.
Instituti Qendror i Shëndetit Mendor në Gjermani (CIMH), që kërkoi miratimin e programit, e cilësoi vendimin si një hap historik për mjekësinë moderne. Sipas Dr. Gerhard Gründer, kreu i departamentit të neuroimazherisë molekulare, kjo terapi mund të ofrojë një alternativë të justifikueshme etike dhe mjekësore, veçanërisht për ata që nuk kanë përfituar nga trajtimet standarde.
Depresioni prek miliona njerëz në mbarë botën, por deri në 30 për qind e pacientëve nuk reagojnë ndaj trajtimeve ekzistuese. Studimet e fundit nga Mbretëria e Bashkuar dhe SHBA tregojnë se psilocibina mund të stimulojë lidhjet mes rajoneve të ndryshme të trurit, duke ulur përqendrimin obsesiv dhe mendimet rrotulluese – simptoma të zakonshme në depresionin rezistent.
Gjermania i bashkohet kështu vendeve të tjera si Republika Çeke, që legalizoi së fundmi përdorimin mjekësor të psilocibinës, ndërsa projekte të financuara nga BE janë duke e testuar atë në pacientë me sëmundje progresive si skleroza e shumëfishtë. Ndërkohë, grupet avokuese si Aleanca Evropiane për Qasjen dhe Kërkimin në Produkte Psikedelike (PAREA) kërkojnë zgjerimin e aksesit dhe theksojnë rëndësinë e të dhënave nga përdorimi real për përshpejtimin e miratimeve të ardhshme.
CIMH parashikon interes të madh nga pacientët, duke u mbështetur në përvojën e Zvicrës, ku kërkesa e ka tejkaluar ndjeshëm ofertën. Instituti bën thirrje për vazhdimin e punës drejt integrimit të terapive psikedelike në sistemin standard të trajtimit të sëmundjeve mendore.
