Tri varre vikinge të gërmuara në Norvegji përmbajnë monedha nga vende të largëta dhe një gur simbolik të gdhendur në formën e organit gjenital femëror.
Varret, të cilat duket se i përkisnin grave, u zbuluan në bregun perëndimor të Norvegjisë nga kërkues me detektor metalesh. Ato datojnë nga fillimi i viteve 800 pas Krishtit, gjatë Epokës Vikinge (793 deri në 1066 pas Krishtit), sipas arkeologut kryesor Søren Diinhoff nga Universiteti i Bergenit, i cili foli për Sciencenorway.no.
“Nga një këndvështrim kërkimor, ky është një thesar i vogël,” tha Diinhoff.
Një hulumtim me detektor metalesh sugjeron se këto tri varre janë pjesë e ndoshta 20 të tjerave në këtë vend, që ndodhet në një zonë të quajtur Skumsnes në komunën e Fitjarit. Edhe pse kockat e banorëve janë zhdukur prej kohësh, sendet e tyre funerare, kanë mbetur karfica, rruaza prej qelqi, monedha dhe gurë të rregulluar në formën e një varke. Disa nga stolitë dhe monedhat kanë origjinë nga Irlanda, Anglia dhe perandoria Franke, e cila përfshinte një pjesë të madhe të Europës Perëndimore në atë kohë. Gjetja më e habitshme ishte një monedhë e rrallë nga jugu i Danimarkës me një barkë vikinge të stampuar në njërën anë dhe një dre në anën tjetër.
Ky zbulim tregon tregtinë dhe migrimin e gjatë distancave që ndodhte në shoqëritë vikinge të asaj kohe. Gratë në këto varre duket se kishin një lidhje me Europën kontinentale, tha Diinhoff.
“Kjo nuk është thjesht rastësi,” shtoi ai. “Ndoshta ato vinin nga jashtë dhe martoheshin me banorët vendas.”
Skumsnes ishte një fermë në atë kohë, e cila ka të ngjarë të ketë qenë në pronësi të një mbreti lokal, sipas kërkuesve. Ndodhej afër bregut dhe mund të ketë shërbyer si një pikë ndalese për udhëtarët. Një nga gratë ishte varrosur me gurë të rregulluar në formën e një varke 4 metra të gjatë për ta shoqëruar në jetën e përtejme. Në vendin ku do të ishte shtylla e direkut, arkeologët gjetën një gur në formë vulve, i cili mund të jetë përdorur për të simbolizuar gruan e varrosur në këtë varr. Është gjithashtu e mundur, sipas Diinhoff-it, që gruaja të mos ishte varrosur fare aty dhe që varri të ishte një cenotaf, një përmendore pa trup. Megjithatë, është e vështirë të thuhet me siguri, pasi toka në pjesën perëndimore të Norvegjisë nuk i ruan mirë materialet organike.
Varka e varrit përmbante gjithashtu gërshërë për lesh, një hetçel (krehër për përgatitjen e fibrave për tjerrje dhe endje), një rrotë tjerrjeje dhe një shpatë endjeje, të gjitha sende të përdorura për të prodhuar tekstile, si dhe një çelës prej bronzi. Kjo tregon se gruaja për të cilën ishte dedikuar ky varr ishte me status të lartë: Prodhimi i tekstileve ishte prestigjioz, dhe çelësi tregon se ajo ishte kryezonjë e një familjeje.
Unn Pedersen, një arkeologe nga Universiteti i Oslos, tha për Sciencenorway se prodhimi i tekstileve ishte një rrugë drejt pasurisë dhe sigurisë për gratë e Epokës Vikinge.
“Nëse nuk ishin pjesë e elitës, këto gra ishin padyshim në krye të hierarkisë sociale dhe ekonomike,” theksoi ajo. / Live Science – Syri.net
