Kryetarja e Kuvendit të Kosovës dhe ushtruesja e detyrës së presidentes, Albulena Haxhiu, ka reaguar pas shpalljes së aktgjykimit ndaj ish-presidentit Hashim Thaçi, ish-kryeparlamentarit Kadri Veseli dhe ish-krerëve të UÇK-së, Jakup Krasniqi e Rexhep Selimi, nga Dhomat e Specializuara në Hagë.
Haxhiu e ka cilësuar aktgjykimin dhe dënimet e shqiptuara si një “goditje të rëndë” për familjet e të dënuarve, ndërsa vendimin e ka përshkruar si një lajm “thellësisht tronditës” për Republikën e Kosovës dhe një moment të rëndë për kombin shqiptar.
Në reagimin e saj, Haxhiu ka shprehur mbështetje për familjet e Thaçit, Veselit, Krasniqit dhe Selimit, duke theksuar se ato prej vitesh janë përballur me mungesën, pritjen dhe pasigurinë. Ajo ka bërë thirrje që familjarët të qëndrojnë të fortë dhe ka rikujtuar se procesi gjyqësor nuk përfundon me aktgjykimin e shkallës së parë, pasi ekziston e drejta e ankimit, përcjell “Bota sot”.
Mes tjerash, aj ka kërkuar që dënimet e sotme të mos përdoren për të relativizuar krimet e kryera nga regjimi i Serbisë gjatë luftës në Kosovë, ndërsa ka bërë thirrje për qetësi, dinjitet dhe bashkim në këtë moment.
Reagimi i plotë
Aktgjykimi i sotëm dhe dënimet e shqiptuara ndaj Hashim Thaçit, Kadri Veselit, Jakup Krasniqit dhe Rexhep Selimit janë një goditje e rëndë për familjet e tyre, një lajm thellësisht tronditës për Republikën e Kosovës dhe një çast i rëndë për kombin shqiptar kudo që jeton.
Në një ditë si kjo, pesha e këtij vendimi nuk mund të ndahet nga historia prej së cilës kemi ardhur. Kosova e ka përjetuar mbi vete dhunën e një aparati shtetëror që vrau civilë, kreu masakra, dëboi qindra mijëra shqiptarë nga shtëpitë e tyre dhe la pas mijëra të vrarë e të zhdukur. Kjo përvojë është pjesë e pashlyeshme e kujtesës së Kosovës dhe të kombit shqiptar.
Mendimet e mia janë, para së gjithash, me familjet e Hashim Thaçit, Kadri Veselit, Jakup Krasniqit dhe Rexhep Selimit. Prej vitesh ato mbajnë barrën e mungesës, pritjes dhe pasigurisë. Dënimet e sotme e bëjnë këtë barrë edhe më të rëndë.
Atyre ua përcjell nga Kosova një porosi, qëndroni të fortë, Kosova është me ju. Fjala e fundit juridike nuk është thënë. E drejta e ankimit është pjesë e procesit dhe duhet të ushtrohet plotësisht.
Lufta e Ushtrisë Çlirimtare të Kosovës ishte çlirimtare. Ajo lindi përballë shtypjes, dhunës dhe krimeve të regjimit të Serbisë ndaj popullit të Kosovës. Asnjë aktgjykim nuk mund ta ndryshojë natyrën e asaj lufte dhe as të zhbëjë të drejtën e një populli për të luftuar për lirinë e vet.
Respekti për drejtësinë nuk nënkupton heshtje përballë çdo përpjekjeje për ta shtrembëruar historinë. Nuk duhet lejuar që dënimet e sotme të përdoren për të relativizuar krimet e regjimit të Serbisë, për ta zvogëluar përgjegjësinë për to apo për të krijuar një narrativë të rreme.
Këtë qartësi e presim edhe nga miqtë dhe aleatët tanë.
Sot na duhet qetësi, dinjitet dhe bashkim. Dhimbja e kësaj dite nuk duhet të na ndajë.
Republika e Kosovës do ta përballojë edhe këtë sprovë duke i qëndruar besnike drejtësisë, lirisë dhe së vërtetës së saj. Sepse aktgjykimet nuk mund ta gjykojnë historinë e një populli as nuk mund ta rishkruajnë atë.
