Moda e fundit në rrjetet sociale është ajo e “parasite cleanse”, një pastrim i trupit nga krimbat dhe parazitët, dhe është përhapur më shumë pas deklaratave të supermodeles amerikane. Heidi Klum.
Ky program dietik bazohet në një regjim të rreptë me barishte dhe fara, duke eliminuar ushqime të yndyrshme, të përpunuara ose që përmbajnë gluten dhe laktozë. Klum rrëfeu se e nisi këtë pastrim pasi ishte “bombarduar” me video dhe postime në Instagram:
“Më thanë se duhet ta bësh një herë në vit dhe unë nuk e kam bërë kurrë. Ndihem vërtet vonë. Nuk e di çfarë do të dalë nga unë. Po filloj tani dhe duhet bërë për muaj të tërë.” Ajo shtoi gjithashtu se “të gjithë kanë parazitë”, prandaj, sipas saj, ky pastrim do të ishte i nevojshëm.
Megjithatë, ekspertët shpjegojnë se kjo nuk është e vërtetë dhe se kjo “pseudo-dietë” mund të jetë jo vetëm e panevojshme, por edhe e dëmshme.
Si funksionon kjo dietë?
Pastrimi i parazitëve synon të eliminojë parazitët nga zorra dhe është përhapur në rrjet me hashtagun #parasitecleanse. Ai bazohet kryesisht në dy pika:
Përdorimi i barishteve dhe erëzave me efekte të pretenduara anti-parazitare, si piper i zi, fara papaje, xhenxhefil, hudhër, kurkuma, fara kungulli, rigon, trumzë, arrë e zezë, berberinë.
Eliminimi i ushqimeve të yndyrshme, të përpunuara, glutenit dhe produkteve të qumështit, duke përfshirë edhe mishin e derrit dhe duke rritur konsumimin e frutave dhe perimeve.
Çfarë thonë ekspertët?
Ekspertët e shëndetit e kanë mohuar këtë ide. Dr. Peter Mannon, gastroenterolog në Universitetin e Nebraska-s, tha se “njerëzit mesatarisht nuk kanë parazitë aktivë në zorrë”.
Nga ana e sigurisë dhe praktikueshmërisë së dietës, problemi rritet: regjimi është tepër restriktiv dhe i pabalancuar. Nutricionistja Beth Czerwony nga Cleveland Clinic tha për People se: “Nuk ka prova të besueshme që tregojnë efektivitetin e këtyre pseudo-pastrimeve. Infeksionet parazitare kërkojnë ilaçe, jo trajtime me barishte.”
Dr. Jeffrey Dvorin, kirurg dhe infektivolog në Boston Children’s Hospital, shtoi se këto pastrime mund të dëmtojnë mikrobiomën e zorrëve, të shkaktojnë nauze dhe dehidrim, dhe disa përbërës, si piper i zi, mund të shkaktojnë konvulsione ose humbje të ndjenjave nëse konsumohen tepricë.
Dr. James Dooley, mikrobiolog në Universitetin e Ulster-it, ishte shumë i qartë: “Nuk ka asnjë provë shkencore për pastrimet e parazitëve, është pseudoshkencë e pastër.”
Në përfundim, ekspertët e konsiderojnë këtë trend të panevojshëm, potencialisht të dëmshëm dhe antishkencor, pavarësisht promovimit nga personazhe të njohura si Heidi Klum.
