Një burrë në Tajvan, i cili përdori fshesën robotike të shtëpisë për të zbuluar nëse gruaja e tij po e tradhtonte,u dënua me burg për shkelje të privatësisë së saj.
Dyshimet e tij nisën pasi gjeti në shtëpi një furçë dhëmbësh dhe sende të tjera personale që nuk i përkisnin as atij dhe as bashkëshortes. Më pas, kamerat e sigurisë filmuan një burrë të panjohur duke e shoqëruar gruan në shtëpi pas punës.
Sipas mediave lokale, ai gjeti një mënyrë për ta monitoruar fshehurazi gruan, duke përdorur fshesën robotike të pajisur me transmetim të drejtpërdrejtë audio dhe video, funksion që zakonisht përdoret për të kontrolluar pastrimin e shtëpisë.
Pamjet e regjistruara nga pajisja, sipas raportimeve, tregonin gruan duke u veshur dhe zhveshur, si edhe një burrë tjetër të shtrirë lakuriq në divanin e shtëpisë. Gjykata dëgjoi gjithashtu se në disa raste pajisja kishte filmuar takime intime mes tyre, përfshirë një episod që thuhet se ndodhi në prag të Krishtlindjeve.
Burri vendosi ta padisë gruan dhe gjykata civile në Tajvan e shpalli atë fajtore për cenimin e të drejtave martesore të bashkëshortit. Gruaja dhe i dashuri i saj u urdhëruan t’i paguanin atij 500 mijë dollarë tajvanezë (rreth 12,500 paund).
Megjithatë, çështja mori një kthesë tjetër kur gruaja ngriti padi kundër bashkëshortit, duke argumentuar se ai kishte shkelur ligjin duke e filmuar lakuriq pa pëlqimin e saj.
Ligji tajvanez e konsideron vepër penale regjistrimin ose shpërndarjen e fshehtë të aktiviteteve private apo informacioneve intime të një personi pa miratimin e tij.
Burri, identiteti i të cilit nuk është bërë publik nga gjykata, është dënuar me pesë muaj burg dhe me një gjobë prej 150 mijë dollarësh tajvanezë (rreth 3,700 paund), për regjistrimin e paligjshëm të pamjeve private.
Sipas mediave lokale, ai pritet ta apelojë vendimin e gjykatës. Ndërkohë, nuk dihet nëse gruaja dhe i dashuri i saj vazhdojnë ende lidhjen e tyre. /Dailystar/
