Anëtari i Partisë Socialdemokrate, Zgjim Hyseni, ka komentuar arrestimin e politikanit serb nga veriu, Aleksandar Arsenijeviq, ditën e sotme nga ana e Policisë së Kosovës.
Hyseni tha se kur një person është vetëm me pipëz dhe policia e arreston në mënyrën, që sipas tij, ndodhi sot me Arsenijeviqin, nuk është më diskutimi midis atyre që janë për sovranitet dhe atyre që janë me Serbinë,
“Duke bërë diçka të tillë as nuk je duke shtrirë sovranitet e as duke e luftuar Serbinë. Duke bërë diçka të tillë, thjesht je duke i shkelur të drejtat themelore të njeriut. Nëse dikush ka pipëz në dorë dhe fishkëllen, nuk është kurrfarë shkelje e ligjit, e për më tepër ky veprim, ka nxjerr në pah diçka, që ka dy standarde për mënyrën se si reagon policia, e kjo nuk bën të ndodh”.
“Në Prishtinë, pse i bie pipëzës në ambient të hapur, nuk arrestohesh ashtu. Në Prishtinë, madje edhe në kuvend mund t’i biesh pipëzës me orë të tëra, siç ka bërë kryeministri vet. Mua mu duk se aty nuk pat rend dhe ligj, por pati shkelje të të drejtave themelore të njeriut”, tha Hyseni.
Tutje, ai tha se statusin e viktimës që e ka pasur Kosova në të kaluarën, nuk bën duhet përdorur sot si arsye për të bërë represion ndaj të tjerëve.
