Pacientët të cilëve u është përshkruar ilaçi Ropinirole për sindromën e këmbëve të shqetësuara (RLS) pretendojnë se mjekët nuk i paralajmëruan për efektet anësore serioze, duke përfshirë varësinë nga bixhozi dhe sjelljet seksuale të rrezikshme.
Një grua kujtoi se kishte lënë shtëpinë gjatë natës në kërkim të marrëdhënieve seksuale, ndërsa një tjetër grumbulloi borxhe nga bixhozi deri në 80,000 paund. Ropinirole, një agonist i dopaminës i përshkruar në Shërbimin Shëndetësor Kombëtar të Mbretërisë së Bashkuar (NHS), dihet se shkakton sjellje impulsive si bixhozi patologjik, ngrënia e pakontrolluar dhe hiperseksualiteti, sipas udhëzimeve të institucionit shëndetësor NICE.
RLS shkakton ndjesi të pakëndshme në këmbë, duke krijuar një nevojë të fortë për t’i lëvizur ato. Ky ilaç, i krijuar për të rregulluar lëvizjen, ndikon gjithashtu në sistemin e kënaqësisë dhe shpërblimit të trurit, duke rritur ndjesinë e kënaqësisë nga aktivitetet stimuluese.
Pavarësisht këtyre rreziqeve, 20 gra thanë për BBC-në se nuk ishin paralajmëruar për këto efekte anësore, të cilat, sipas tyre, u shkatërruan jetën.
Një raport i brendshëm i kompanisë farmaceutike GSK, e cila prodhon Ropinirole, tregoi se rreziqet e sjelljeve impulsive ishin të njohura që në vitin 2003. Kompania pretendon se i ndau këto informacione me rregullatorët e barnave dhe se fletëpalosjet për pacientët kanë përmendur “ndryshime” në interesin seksual që nga viti 2007.
Claire, një grua që mori Ropinirole pas shtatzënisë, fillimisht tha se ilaçi ishte efektiv për RLS-në. Por një vit më vonë, ajo përjetoi dëshira seksuale të pakontrollueshme, duke ekspozuar trupin para të panjohurve dhe duke u angazhuar në sjellje të rrezikshme, pavarësisht se e kuptonte që ishte gabim. Dëshirat u ndalën menjëherë pasi ajo ndërpreu ilaçin, por tani asaj i vjen turp nga vetja.
Një grua tjetër, Sue, hyri në borxhe të mëdha nga bixhozi, por nuk ishte paralajmëruar për rreziqet e sjelljeve impulsive kur iu përshkrua një tjetër agonist i dopaminës.
Një raport i GSK i vitit 2003 dokumentoi raste të “sjelljeve deviante” tek dy burra që merrnin Ropinirole për sëmundjen e Parkinsonit. Njëri, një 63-vjeçar, përdhunoi një fëmijë pasi zhvilloi një “problem me libidon”, çka çoi në një dënim me burg. Një tjetër, 45 vjeç, kreu akte të pahijshme të lidhura me shtimin e dëshirës seksuale.
Në vitin 2011, pacientët me Parkinson paditën GSK, duke pretenduar se Ropinirole i çoi në varësi nga bixhozi dhe në prishjen e marrëdhënieve personale. Ata pohuan se paralajmërimet për rreziqet u vonuan deri në vitin 2007, pavarësisht studimeve mjekësore të mëparshme që lidhnin ilaçin me sjelljet kompulsive. Çështja u zgjidh jashtë gjykatës, megjithëse GSK mohoi përgjegjësinë.
GSK deklaroi se Ropinirole ka kaluar nëpër prova të gjera klinike dhe është një trajtim efektiv për RLS dhe Parkinsonin. Kompania insiston se fletëpalosjet e saj paralajmërojnë për efektet anësore të mundshme, përfshirë ndryshimet në interesin seksual, prirjet për bixhoz dhe blerjet kompulsive. / Independent – Syri.net
