Teksa po afrohej afati i vendosur nga SHBA për hapjen e Ngushticës së Hormuzit, pritej një lëvizje drejt zbutjes së konfliktit pesë-javor mes Uashingtonit dhe Teheranit. Por ndodhi e kundërta: Irani refuzoi çdo hap të menjëhershëm për rihapjen e kësaj rruge kyçe energjetike. Ndërkohë, presidenti amerikan Donald Trump paralajmëroi pasoja të rënda për Teheranin nëse deri në fund të së martës nuk arrihet një marrëveshje që do të rikthente lëvizjen e lirë të trafikut.
Një plan i ndërmjetësuar nga Pakistan, i hartuar pas kontakteve intensive gjatë natës së të hënës, parashikon një armëpushim të menjëhershëm dhe më pas negociata për një marrëveshje më të gjerë brenda 15–20 ditësh.
Shefi i ushtrisë pakistaneze, Asim Munir, ka qenë në komunikim të vazhdueshëm me zëvendëspresidentin amerikan JD Vance, të dërguarin special Steve Witkoff dhe ministrin e Jashtëm iranian Abbas Araqchi.
Ministria e Jashtme e Iran deklaroi se Teherani ka përcaktuar qartë qëndrimet dhe kërkesat e tij, të cilat janë përcjellë përmes ndërmjetësve si përgjigje ndaj propozimeve për armëpushim. Zëdhënësi Esmaeil Baghaei theksoi se negociatat nuk mund të zhvillohen nën presion apo kërcënime.
“Irani i shpreh hapur kërkesat e tij legjitime dhe kjo nuk është shenjë kompromisi, por dëshmi e vendosmërisë për të mbrojtur pozicionet e veta,” u shpreh ai, duke shtuar se kërkesat e mëparshme të SHBA-së janë konsideruar të papranueshme.
Një zyrtar i lartë iranian konfirmoi gjithashtu se vendi nuk do ta rihapë Ngushticën si pjesë e një armëpushimi të përkohshëm dhe nuk do të pranojë afate apo presion për marrëveshje.
/tiranapost
