Pas 17 vitesh, Xhoni Konomi ka vendosur të flasë publikisht për një nga periudhat më të vështira të jetës së tij.
Ish-konkurrenti i “Love Story” rrëfeu në rubrikën “Shihemi në Gjyq” vrasjen e të atit dhe ngjarjet që, sipas tij, pasuan atë tragjedi.
Xhoni tregoi se ishte vetëm 15 vjeç kur humbi babain, Franc Konomin. Mes emocionesh, ai pretendoi se pas vrasjes së të atit edhe vetë ishte vënë dy herë në shënjestër.
“Mua ma kanë vrarë babin prej 17 vitesh. Babi im quhej Franc Konomi… Kur më vranë babin, deshën që të më vrisnin edhe mua dy herë”, rrëfeu ai.
Humbja në një moshë kaq të re, pati pasoja të rënda edhe në gjendjen e tij emocionale. Ai tregoi se në atë periudhë kishte menduar t’i jepte fund jetës.
“Unë nuk e përballova dot atë dhimbje dhe doja që të vrisja veten. Desha që të mbysja veten me lloj-lloj mënyrash që ju nuk ia keni idenë. Por nuk ka dashur Zoti që të më marrë”, u shpreh ai.
Xhoni foli edhe për mënyrën se si u rrit pas humbjes së babait. “Unë jam rritur vetëm me femra në familjen time, nuk e kam pasur një burrë që të më tregonte se si të rruhesha apo të sillesha”, tha ai.
Franc Konomi u vra në korrik të vitit 2010 pranë zonës së Pazarit të Ri në Tiranë. Vite pas ngjarjes, familja e tij thotë se po përballet edhe me një konflikt për trashëgiminë.
Në “Shihemi në Gjyq”, familjarët ngritën pretendime për mënyrën se si janë administruar dhe tjetërsuar disa prej pasurive të lëna prej tij. Këto pretendime për pronësinë mbeten pjesë e konfliktit mes palëve dhe nuk duhen konsideruar të provuara vetëm nga deklaratat televizive.
Xhoni dhe motra e tij, Franceska, kërkojnë të njihen si trashëgimtarë të ligjshëm të babait dhe të përfitojnë pjesën e pasurisë që pretendojnë se u takon. Për Xhonin, dalja në “Shihemi në Gjyq” shënoi edhe momentin kur vendosi të fliste publikisht për një histori personale që thotë se e ka mbajtur brenda vetes që nga adoleshenca.
