Trajtimi i Princeshës Kate Middleton kundër kancerit po ecën mirë dhe ajo do të marrë pjesë në “Trooping the Color” të shtunën.
Kjo do të jetë dalja e saj e parë publike këtë vit pas diagnostifikimit me kancer.
Në një mesazh për publikun teksa publikon një foto të bërë së fundmi, Kate thotë se trajtimi i saj është ende në vazhdim dhe do të vazhdojë edhe për disa muaj të tjerë.
Ja çfarë shkruan Kate.
“Siç do ta dijë kushdo që kalon nëpër kimioterapi, ka ditë të mira dhe ditë të këqija. Në ato ditë të këqija ndihesh e dobët, e lodhur dhe duhet t’i dorëzohesh trupit duke pushuar. Por në ditët e mira, kur ndihesh më e fortë, dëshiron të shfrytëzosh sa më shumë të ndihesh mirë“, u shpreh ajo.
“Po mësoj se si të jem e durueshme, veçanërisht me pasigurinë. Duke marrë çdo ditë ashtu siç vjen, duke dëgjuar trupin tim dhe duke i lejuar vetes të marr këtë kohë shumë të nevojshme për t’u shëruar.”
Për “Trooping the Colour”, princesha do të jetë në paradën e karrocave me fëmijët e saj dhe do të jetë pjesë e grupit të familjes që do të shfaqet nga ballkoni i Pallatit Buckingham.
/tiranapost
