Një fermer britanik u ribashkua me orën e tij Rolex, 50 vjet pasi besohej se ajo ishte bërë “vakt ushqimi” për një lopë të uritur e cila bashkë me barin mund të kishte gëlltitur edhe aksesorin e shtrenjtë.
James Steele, 95 vjeç, tha se ai e bleu Rolex menjëherë pas ditëlindjes së tij të 21-të në vitin 1950, por ai e humbi atë rreth 20 vjet më vonë ndërsa punonte në fermën e tij në Shropshire, Angli.
Steele tha se ai kërkoi në fusha për të gjetur orën, por i vetmi “i dyshuar” aty pranë ishte një lopë duke kullotur.
“Lopa mund ta kishte ngrënë”, tha Steele.
Bëhet e ditur se ora është rishfaqur tani 50 vjet më vonë, pasi djali i Steele i dha leje gjuetarit të thesarit, Liam King, të përdorte detektorin e tij metalik për të kërkuar monedha të vjetra në pronën e tij.Por, mbetet e paqartë nëse ora ka kaluar vërtet në gojën e një lope.
“Isha mjaft i gëzuar sepse kurrë nuk e kisha menduar se do ta shihja orën më”, tha Steele.
Ai tha se ora nuk është në gjendje pune, por ka shmangur ndryshkjen me kalimin e viteve.
