Në 35-vjetorin e rënies heroike të veprimtarëve të shquar çlirimtarë, Afrim Zhitia e Fahri Fazliu, kryetari i Kuvendit të Kosovës, Glauk Konjufca së bashku me kryeministrin Albin Kurti, ka bërë homazhe dhe vendosi lule pranë varreve.
Konjufca tha se liria e Kosovës erdhi sepse kishte çlirimtarë si Afrim Zhitia dhe Fahri Fazliu, duke lënë porosinë e qartë se mirë të vdiste me armë në dorë kundër Serbisë okupatore, se sa të jetohet në robëri.
I pari i Kuvendit tha se Zhitia e Fazliu jo vetëm që ishin çlirimtarë e luftëtarë, por edhe intelektualë të mëdhenj.
“Veprat e tyre, shkrimet e tyre, mendimi i tyre politik na frymëzon edhe sot e kësaj dite, sepse është mendim politik çlirimtar, është mendim politik i vetëdijes së lirisë. Ata përmes sakrificës së tyre sublime, duke dhënë edhe jetën për atdhe, lanë amanetin për çlirimtarët e ardhshëm. Duke e dhënë shembullin e tyre ideal, përmes dhënies së jetës, u bënë pararendës të vërtetë të Ushtrisë Çlirimtare të Kosovës, prandaj do të kujtohen e do të nderohen gjithmonë nga institucionet dhe populli i Kosovës”, theksoi Konjufca. /teve1.info/
