Debatet mbi pjesëmarrjen e Izraelit në Festivalin e Këngës Eurovision 2026 po përshkallëzohen edhe në Portugali, ku 17 artistë pjesëmarrës në konkursin kombëtar Festival da Canção kanë deklaruar se do të refuzojnë të përfaqësojnë vendin nëse shpallen fitues.
Në një deklaratë të përbashkët, artistët kritikuan ashpër vendimin e EBU-së për të lejuar Izraelin në garë, duke iu referuar veprimeve të tij në Gaza, të cilat, siç theksuan ata, një hetim i pavarur i Kombeve të Bashkuara i ka vlerësuar si gjenocid.
“Ne nuk pranojmë bashkëpunim në shkeljen e të Drejtave të Njeriut,” thuhej në reagim. “U habitëm që të njëjtat standarde nuk u aplikuan si në rastin e Rusisë në vitin 2022.”
Mes nënshkruesve janë emra si Cristina Branco, Bateu Matou, Rita Dias, DjoDje, Evaya, Francisco Fontes, Gonçalo Gomes dhe të tjerë.
RTP kundër bojkotit, publik i zemëruar
Transmetuesi publik RTP konfirmoi se pavarësisht reagimeve, Portugalia do të marrë pjesë në Eurovision 2026 dhe do të organizojë si zakonisht Festival da Canção.
Qëndrimi i RTP-së u kritikua publikisht edhe nga fituesi i vetëm portugez i Eurovisionit, Salvador Sobral, i cili e quajti vendimin “frikacakëri politike”.
Ndërkohë, reagimi publik ka marrë përmasa të mëdha: mbi 22,000 persona kanë nënshkruar një peticion që kërkon tërheqjen e menjëhershme të Portugalisë nga konkursi. Peticioni akuzon RTP-në se “po e vendos Portugalinë në anën e gabuar të historisë”.
Valë bojkoti në Europë
Pas konfirmimit të pjesëmarrjes së Izraelit nga EBU-ja, katër shtete—Irlanda, Spanja, Holanda dhe Sllovenia—shpallën se do të bojkotojnë Eurovisionin “përgjithmonë”.
Islanda u bë vendi i pestë që iu bashkua bojkotit, me transmetuesin RÚV që deklaroi se pjesëmarrja e Izraelit “ka krijuar përçarje të thella” dhe nuk mund të jetë “burim gëzimi dhe paqeje”.
Edicioni i 70-të i Festivalit të Këngës Eurovision do të zhvillohet më 16 maj 2026 në Vjenë, mes një prej krizave më të mëdha politike që ka goditur ndonjëherë konkursin.
