Me kalimin e moshës, lëkura bëhet më e hollë, më e thatë dhe më e ndjeshme. Rreth moshës 50-vjeçare, ndryshimet hormonale e bëjnë atë edhe më të brishtë, ndaj disa zakone të përditshme që më parë nuk shkaktonin probleme mund të favorizojnë skuqjen, dukjen e kapilarëve dhe theksimin e rrudhave.
1. Kur mendon se sa më shumë produkt, aq më i mirë është rezultati
Vendosja e shumë serumeve, kremrave dhe vajrave nuk do të thotë domosdoshmërisht më shumë përfitim. Kur përdoren shtresa të tepërta, produktet mund të mbeten në sipërfaqen e lëkurës, ta rëndojnë atë dhe të pengojnë përbërësit aktivë të veprojnë siç duhet.
Edhe ato kokrrizat e vogla që shfaqen dhe rrotullohen mbi fytyrë, të njohura si pilling, mund të jenë shenjë se janë përdorur shumë produkte.
Më mirë është të zgjidhni pak produkte, por të përshtatshme: një serum me përbërës kundër plakjes, një krem hidratues dhe një krem mbrojtës ndaj diellit.
2. Ta bësh rutinën me nxitim
Aplikimi i pastruesit, tonikut, serumit dhe kremit njëri pas tjetrit pa pritur fare mund të ulë efektivitetin e produkteve.
Shumica e produkteve kanë nevojë për rreth 1–2 minuta që të ndërveprojnë siç duhet me barrierën e lëkurës. Një mënyrë praktike është të vendosni serumin dhe, ndërkohë, të lani dhëmbët. Më pas aplikoni kremin dhe në fund mbrojtësin diellor.
3. Ta aplikosh produktin në mënyrën ose vendet e gabuara
Një gabim i zakonshëm është ta vendosni serumin fillimisht në pëllëmbë dhe më pas ta fërkoni në fytyrë. Një pjesë e produktit përfundon në duar në vend që të shkojë në lëkurë.
Më mirë është të vendosni disa pika direkt në ballë, faqe, hundë dhe mjekër dhe më pas ta përhapni butësisht, pa e tërhequr lëkurën.
Gjithashtu, nuk duhet harruar qafa, dekolteja dhe veshët, veçanërisht kur përdorni krem kundër diellit. Për fytyrën dhe qafën ekspertët rekomandojnë sasinë e njohur si “rregulli i dy gishtave” për mbrojtësin diellor.
4. Të jesh shumë agresive me lëkurën
Pas moshës 50-vjeçare, veçanërisht për shkak të uljes së estrogjenit, lëkura bëhet më e thatë dhe delikate. Pastruesit me kokrriza të mëdha, furçat elektrike, dorezat e ashpra dhe masazhet e forta mund ta irritojnë dhe madje të dëmtojnë kapilarët.
Eksfolimi mekanik të zëvendësohet me eksfolim kimik të butë, për shembull me PHA ose përqendrime të ulëta AHA, jo më shumë se një ose dy herë në javë.
Edhe uji shumë i nxehtë dhe fërkimi i fytyrës me peshqir mund të dëmtojnë barrierën mbrojtëse të lëkurës. Zgjidhja është ujë i vakët dhe tharje me prekje të buta.
5. Të shpenzosh shumë për një krem luksoz dhe pak për përbërësit aktivë dhe SPF
Një rutinë e mirë kundër plakjes nuk varet nga çmimi i kremit, por nga përbërësit dhe përdorimi i rregullt.
Ndër përbërësit që përmenden janë retinoidet, vitamina C dhe niacinamidi. Për mëngjes rekomandohet një serum antioksidues, ndërsa në mbrëmje një serum me retinoid nëse lëkura e toleron.
Për hidratimin mund të mjaftojë një krem më i thjeshtë me acid hialuronik, glicerinë, ceramide ose vajra të lehtë. Një pjesë e mirë e buxhetit ia vlen të shkojë te mbrojtësi diellor me spektër të gjerë, i përdorur çdo ditë të vitit. Rezultatet nga përbërësit aktivë kërkojnë durim dhe mund të duhen rreth 8–12 javë përdorim të vazhdueshëm.
Rutina e thjeshtë kundër plakjes
Në mëngjes:
pastrim i butë;
serum antioksidues ose hidratues;
krem i lehtë;
mbrojtës diellor në sasinë e duhur, deri në qafë dhe dekolte.
Në mbrëmje:
pastrim i dyfishtë dhe i butë nëse keni përdorur grim;
serum me retinoid ose niacinamid;
krem ushqyes.
