Në mbledhjen e parë që mbajti të enjten si kryeministër i rizgjedhur dha një sinjal.
Kurti deklaroi se është i gatshëm që të nis nga e premtja diskutimet me subjektet tjera politike, për çështjen e presidentit.
E po në këtë ditë, televizioni kontaktoi Zyrën e Kryeministrit për të parë nëse ka ndonjë lëvizje në këtë aspekt.
Të njëjtit nuk kthyen një përgjigje.
Për çështjen e presidentes, së cilës mandati i skadon më 5 prill, nga kryesia e LDK thanë se ende nuk kanë marrë një ftesë.
Mirëpo nga kjo parti, deklaruan për tëvë1 se një nga personalitet që plotëson kriteret për këtë pozitë është Ramush Haradinaj.
Në anën tjetër, një ftesë për diskutim të hapur për të parin e shtetit, nuk kanë marrë as nga Aleanca për Ardhmërinë e Kosovës.
Sipas deputetit të kësaj partie, Besnik Tahiri, ende nuk kanë kërkuar nënshkrime për postin e Ramush Haradinaj për president.
“Jo nuk kemi kërkuar ne, as nuk na takon se jemi partia më e vogël, por ne nuk e kemi të msheftë e as sekret qëllimin tonë që z. Haradinaj me qenë president. Por, kjo nuk ka qenë kurrë temë, e para se çka duhet të diskutojmë ne është a do të sfidojmë këtë shumicë edhe më një kandidat tonin apo do të kalojmë si herën e kaluar pa e sfidu Qeverinë gjithë opozita bashkë. Unë jam me sfidu”, tha ai.
Deri tani, presidentja aktuale Vjosa Osmani pritet të jetë kandidatura kryesore.
Mirëpo sipas analistit Shemsi Jashari, e njëjta duke se nuk do të arrijë të sigurojë numrat e mjaftueshëm.
“E ka dëshirë të kahmotme që të jetë presidente, por duket që nuk do të arrij të sigurojë numrin e nevojë të votave në Kuvend për të marr mandatin e dytë. Kjo si pasojë që z. Kurti duket i painteresuar që të mbështes e të kërkojë mbështetje nga subjektet e tjera duke e lënë enigmë ose të paqartë ende se kush do të të jetë emri që do të propozohet për president, por po të ishte zonja Osmani e preferuar e partisë në pushtet deri më tani do të pranohej e do të punoj që të sigurohet edhe mbështetja e votave”, tha Jashari.
Vetë presidentja Osmani, rreth dy muaj më parë kishte pranuar se synon edhe një mandat si e para e shtetit, derisa kishte paralajmëruar edhe bisedime për mbështetje të kandidaturës së saj.
Për këtë çështje, tëvë1 ka kontaktuar edhe Partinë Demokratike të Kosovës, por të njëjtit nuk kanë kthyer përgjigje.
