1
Kryeministri Albin Kurti i kërkoi Komisionit Qendror të Zgjedhjeve “edhe më shumë angazhim” për përfundimin e procesit të numërimit të votave të zgjedhjeve parlamentare të 9 shkurtit dhe “kujdes të shtuar në mbrojtjen e vullnetit të votuesve”.
Ai tha në mbledhjen e sotme të Qeverisë se qytetarët presin nga Lëvizja Vetëvendosje që “sa më parë” ta përmbushin obligimin “për formimin e institucioneve në legjislaturën e nëntë”.
“Sot fillon numërimi i votave të diasporës. Sipas njoftimeve të Komisionit Qendror Zgjedhor, më së largu deri në javën tjetër pritet t’i kemi rezultatet përfundimtare për subjektet politike”, tha Kurti.
“Si fitues të qartë të këtyre zgjedhjeve, nga ne qytetarët presin që sa më parë të përmbushim obligimin që na takon për formimin e institucioneve në legjislaturën e nëntë. Deri atëherë, të nderuar kabinet qeveritar, kolegë, pres që të vazhdoni punën dhe punët e mira me po të njëjtin ritëm. Ndërkaq të gjithë presim nga Komisioni Qendror Zgjedhor edhe më shumë angazhim për përfundimin e procesit të numërimit dhe kujdes të shtuar në mbrojtjen e vullnetit të votuesve, për të përmbyllur kësisoj një proces zgjedhor të lirë, të rregullt, të ndershëm e demokratik me pjesëmarrje masive të qytetarëve, për çfarë falënderoj secilën dhe secilin”, shtoi ai.
