Kryeministri i Kosovës, Albin Kurti, ka vlerësuar si konstruktiv dhe dashamirës takimin e zhvilluar këtë të hënë me kryetarin e Lidhjes Demokratike të Kosovës, Lumir Abdixhiku, lidhur me çështjen e presidentit.
Për mediat, Kurti ka thënë se palët janë të përkushtuara për të shmangur zgjedhjet e reja, pasi ato nuk do të zgjidhnin problemin e mungesës së shumicës prej 80 deputetësh.
“Takimi shkoi në një atmosferë konstruktive dhe dashamirëse. Jemi të vendosur që t’i shmangim zgjedhjet e reja, sepse ato nuk do të ishin zgjidhje për numrin prej 80 deputetësh. Ne jemi përpjekur edhe më herët dhe përzgjedhja e kandidatit tonë, Glauk Konjufca, u zyrtarizua më pak se 30 orë para mesnatës ndërmjet 5 dhe 6 marsit, ndërsa kundërkandidatja e tij, Fatmire Kollcaku, u propozua më pak se 3 orë më vonë. Pra, kemi bërë përzgjedhje të detyruar brenda subjektit tonë kur askush nuk kishte propozuar kandidat më parë, dhe ndodhemi ku ndodhemi”, ka thënë Kurti.
Ai ka shtuar se mbetet optimist se përmes takimeve dhe bisedimeve të tilla mund të arrihet një marrëveshje politike.
“Sot mund të them vetëm se atmosfera ishte konstruktive dhe ekzistonte vullneti për të shmangur zgjedhjet e reja, që nuk janë zgjidhje nga ana tjetër. Jam optimist se këto tre javë të mbetura nuk do të shfrytëzohen deri në minutën e fundit”, ka deklaruar Kurti.
I pyetur nëse kishte emra konkretë për zgjidhjen e çështjes së presidentit, Kurti, nuk ka dhënë detaje nga takimi.
“Ne jemi udhëheqës të subjekteve demokratike dhe jemi transparentë sa i përket procesit, por duhet të ruajmë konfidencialitetin e bisedimeve. Në momentin që bisedimet sjellin rezultat konkret, mund të përgjigjemi për të arriturat. Por përderisa ky nuk është rasti, nuk mund të flasim për emra të përveçëm”, ka theksuar Kurti.
Ai ka shtuar se qëndrimi i tij mbetet i njëjtë: për një emër të përveçëm të presidentit nevojitet një shumicë prej 84 ose 85 deputetësh, dhe jo 80 apo 81.
“Vetëm një shumicë prej 84-85 deputetësh do të na bënte komod. Edhe më tutje besoj se numri 80 apo 81 nuk është caku ynë për të ecur përpara, është më shumë se aq. Duhet të synojmë deri në ditën e fundit jo 81 por 84 apo 85 deputetë”, ka thënë ai.
Kryeministri ka njoftuar gjithashtu se do të përpiqet të takohet edhe me kryetarin e Partisë Demokratike të Kosovës, Bedri Hamza, pasi sipas tij presidenti nuk mund të jetë zgjedhje e një apo dy partive të vetme.
Ndryshe, takimi u zhvillua pas përfundimit të mandatit presidencial të Vjosa Osmanit më 4 prill.
Të njëjtën ditë, pozitën e ushtrueses së detyrës e ka marrë Albulena Haxhiu, kryetare e Kuvendit, ashtu siç parashihet me Kushtetutë./teve1.info/
