Kryeministri i Kosovës, Albin Kurti, të hënën, ka vizituar këngëtarin,Sabri Fejzullahu, me rastin e ditëlindjes së 77-të të tij.
Kurti, ka thënë se Fejzullahu është një figurë sa aktive aq edhe e talentuar e muzikës argëtuese të Kosovës.
“Pak njerëz si Sabri Fejzullahu mund të përbashkojnë shpirtin energjik dhe krijimtarinë produktive të kombit tonë”, ka shkruar Kurti në Facebook.
Po ashtu, kryeministri, ka treguar se gjatë bisedës, Fejzullahu i ka rrëfyer përjetimet e tij mbresëlënëse me figura të shquara, momentet kyçe që kanë shënuar karrierën e tij, si dhe përvojat që ka pasur me njerëz të papërsëritshëm si Jusuf Gërvalla.
Sipas Kurtit, çdo histori ishte një pasqyrim i jetës së ndryshimeve të mëdha politike nëpër të cilat kaloi Kosova, e ku siç ka thënë ai ‘mëson diçka më shumë edhe për atë që e ke ditur’.
“Sabri Fejzullahu, me 1098 këngë të shprehjeve të ndryshme muzikore dhe një trashëgimi artistike të pashoqe, është një thesar i gjallë i kulturës sonë”, ka theksuar në fund të postimit./teve1.info/
