Në një kohë që palestinezët në Rripin e Gazës po luftojnë për të përmbushur nevojat thelbësore si ilaçe, ushqim dhe strehim në mes të masakrës pas sulmit të papritur të 7 tetorit mbi Izraelin, lidershipi i lartë i Hamasit thuhet se po jeton një jetë të pasur, në një vend larg Gazës, në Katar.
Me një pasuri marramendëse prej 11 miliardë dollarësh, sipas një raporti të New York Post, Ismail Haniyeh, Moussa Abu Marzuk dhe Khaleed Mashal, tre liderë të Hamasit kanë ruajtur stilin e tyre të jetesës luksoze në Katar. Atje është jo vetëm luksi për ta e familjet e tyre, por edhe streha e sigurt, pasi ka prani të konsiderueshme të ushtrisë amerikane.
Po nga vjen kjo pasuri?
Pasuria vjen nga burime të ndryshme, duke përfshirë Katarin, i cili dyshohet se i ka mbështetur ata me ndihma financiare vjetore. Supozohet se Katari do të përfitojë nga këta drejtues të lartë për të mbajtur kontrollin në Gaza.
Kush është lideri i Hamasit, Ismail Haniyeh?
Ismail Haniyeh lindi në 29 janar të 1962-shit, në kampin e refugjatëve Al-Shati në Rripin e Gazës. Jeton në Katar.
Ai u diplomua me një diplomë bachelor në letërsinë arabe, në 1987.
Për herë të parë me Hamasin u bashkua që kur ishte student dhe që atëherë është rritur në shkallët e organizatës duke u bërë lider i saj.
Karriera politike
Haniyeh ishte kreu i listës së Hamasit që fitoi zgjedhjet legjislative palestineze të vitit 2006 dhe kështu u bë Kryeministër i Shtetit të Palestinës. Presidenti Mahmoud Abbas e shkarkoi Haniyeh nga detyra më 14 qershor 2007 në kulmin e konfliktit Fatah-Hamas, por Haniyeh nuk e pranoi dekretin dhe vazhdoi të ushtrojë autoritetin e kryeministrit në Rripin e Gazës.
Haniyeh ishte lider i Hamasit në Rripin e Gazës nga viti 2006 deri në shkurt 2017, kur ai u zëvendësua nga Yahya Sinëar. Më 6 maj 2017, Haniyeh u zgjodh kryetar i Byrosë Politike të Hamasit, duke zëvendësuar Khaled Mashaal.
Jeta e hershme dhe edukimi
Prindërit e tij palestinezë ishin refugjatë, pasi ata ikën, u dëbuan nga shtëpitë e tyre gjatë Luftës Arabo-Izraelite të vitit 1948. Ai ndoqi shkollat e drejtuara nga Kombet e Bashkuara dhe u diplomua në Universitetin Islamik të Gazës me një diplomë në letërsinë arabe në 1987. Ndërsa ishte në universitet, ai ishte i përfshirë me Hamasin. Nga viti 1985 deri në vitin 1986, ai ishte kryetar i këshillit të studentëve që përfaqësonte Vëllazërinë Myslimane. Ai gjithashtu luajti si mesfushor në ekipin e futbollit të Shoqatës Islame.
Aktivizmi i hershëm
Ai mori pjesë në protestat në Intifadën e Parë dhe iu dha një dënim i shkurtër me burg nga një gjykatë ushtarake izraelite. U arrestua përsëri nga Izraeli në vitin 1988 dhe u burgos për gjashtë muaj. Në vitin 1989 u burgos për tre vjet.
Një vit më vonë, ai u kthye në Gaza dhe u emërua dekan i Universitetit Islamik.
Pozicioni i tij brenda Hamasit vazhdoi të forcohej gjatë Intifadës së Dytë për shkak të marrëdhënieve të tij me Jasinin dhe për shkak të vrasjeve të pjesës më të madhe të udhëheqjes së Hamasit nga forcat izraelite të sigurisë.
Ka qenë edhe kryeministër
Haniyeh u emërua si kryeministër më 16 shkurt 2006 pas fitores së Hamasit në ‘Listën e Ndryshimit dhe Reformës’ më 25 janar 2006.
Njeriu që kundërshtoi Papa Benediktin XVI
Gjatë polemikave të Papa Benediktit XVI për Islamin në vitin 2006, Haniyeh kundërshtoi ashpër fjalët e Papës: “Në emër të popullit palestinez, ne dënojmë vërejtjet e Papës mbi Islamin. Këto vërejtje shkojnë kundër së vërtetës dhe prekin besimin që kemi në zemrën tonë.” Ai dënoi gjithashtu sulmet palestineze ndaj kishave në Bregun Perëndimor dhe Gaza.
Kritikues i Amerikës për vrasjen e Osama bin Laden
Më 2 maj 2011, Osama bin Laden u vra nga forcat amerikane dhe vrasja u lavdërua nga rivali i Hamasit, Fatah. Haniyeh në vend të kësaj dënoi vrasjen e Bin Ladenit si ‘vazhdim i shtypjes amerikane dhe derdhjes së gjakut të muslimanëve dhe arabëve’. Analistët politikë thanë se komentet ishin një përpjekje për të qartësuar dallimet në Rripin e Gazës mes grupeve. Një analist tjetër shkroi se deklarata e Haniyeh-it i drejtohej një auditori arab dhe ai pa një mundësi për të dalluar Hamasin nga Fatah dhe për të shfrytëzuar ndjenjat anti-amerikane. Qeveria e Shteteve të Bashkuara i dënoi komentet e tij si të egra.
Jeta familjare
Haniye është i martuar dhe ka 13 fëmijë. Kaq dihet për familjen e tij.
/tiranapost
