“Mezi po pres të shoh viktimën time të parë”, shkruante një 11-vjeçar nga Suedia në Instagram.
Në anën tjetër të ekranit, një 19-vjeçar i përgjigjej duke e shtyrë të vazhdonte dhe madje i ofronte 14 mijë dollarë për të kryer një krim të rëndë, duke u kujdesur edhe për transportin dhe pajisjet.
Policia ndërhyri në momentin e fundit dhe arriti ta ndalte.
Ky nuk është një rast i izoluar. Në Europë po shfaqet një fenomen i rrezikshëm i quajtur “Violence-as-a-Service”, ku grupet kriminale përdorin rrjete sociale, aplikacione mesazhesh dhe platforma lojërash për të rekrutuar të mitur, duke i shfrytëzuar për veprime të paligjshme.
Në prill, Europol nisi Operacionin “Grimm”, i cili çoi në arrestimin e gati 200 personave në nëntë shtete europiane. Bilanci tregon përmasat e problemit: 63 persona të dyshuar si ekzekutorë, 40 ndihmës, 84 rekrutues dhe 6 organizatorë kryesorë u kapën.
Pesë prej tyre të konsideruar profile të rrezikshmërisë së lartë. Më e rëndësishmja: dhjetëra krime të rënda u parandaluar dhe shumë të rinj u shpëtuan nga përfshirja në botën e dhunës.
/tiranapost
