Një balenë e vogël gri, e cila i gëzoi banorët e shtetit të Uashingtonit pasi lundroi rreth 32 kilometra përgjatë lumit, është gjetur e ngordhur.Ekspertët dyshojnë se uria mund ta ketë shtyrë këtë gjitar të kërkojë vende të reja gjuetie për shkak të rënies alarmante të popullatës së kësaj specie, shkruan Independent.
Balena u gjet të shtunën pranë Raymond, Washington, në lumin Willapa, i cili derdhet në Oqeanin Paqësor në Gjirin Willapa.
Balena hyri në Degën Veriore të Lumit Willapa të mërkurën, përtej gjirit rreth 298 kilometra në jugperëndim të Seattle-it. Banorët u dyndën në urat përgjatë lumit për të parë gjitarin e madh dhe mbushën mediat sociale me foto dhe video të tij duke nxjerrë ajër përmes vrimës në kokën e tij.
Edhe pse balena dukej e dobësuar, ajo sillej normalisht dhe nuk dukej e lënduar, tha në Facebook organizata jofitimprurëse Cascadia Research Collective.
Organizata po i jepte kafshës kohë dhe hapësirë për t’u larguar nga lumi vetë, por kur studiuesit u përpoqën ta gjenin të premten, balena kishte shkuar më tej në rrjedhën e sipërme, në ujëra ku nuk mund të kalojnë anijet, tha Kalambokidis.
Një numër balenash gri ndodhen aktualisht në gjirin si pjesë e migrimit të tyre pranveror prej 8,000 kilometrash, gjatë të cilit ato udhëtojnë nga vendet e tyre të shumimit në Baja California, Meksikë, në vendet e tyre të ushqyerjes në Alaskë.
John Kalambokidis, një biolog kërkimor në Cascadia Research Collective, vuri në dukje një krizë më të gjerë me të cilën përballen popullatat e balenave gri në Paqësorin lindor.Që nga viti 2019, këto balena po përballen me ulje të disponueshmërisë së ushqimit në detet veriore të Beringut dhe Chukchi, pranë brigjeve të Alaskës. “Balenat gri po përballen me një krizë të madhe dhe shkaku i saj duket se lidhet me dietën e tyre në Arktik”, tha ai për Associated Press.
Administrata Kombëtare Oqeanike dhe Atmosferike e SHBA-së (NOAA) ka deklaruar rritje të vdekshmërisë midis balenave gri në Paqësorin lindor, nga fundi i vitit 2018 deri në fund të vitit 2023.
Gjatë asaj periudhe, u regjistruan 690 dalje në breg të balenave gri në një zonë të madhe nga Alaska në Meksikë.
Hetuesit e NOAA arritën në përfundimin se shkaku paraprak ishin “ndryshimet lokale të ekosistemit në zonat subarktike dhe arktike të balenave, duke çuar në ndryshime në disponueshmërinë e ushqimit, kequshqyerje, ulje të niveleve të lindjeve dhe rritje të vdekshmërisë”.
Zyrtarët besonin se popullata po rimëkëmbej, por numërimi më i fundit në vitin 2025 tregoi një rënie të vazhdueshme. Agjencia federale vlerëson se aktualisht ka rreth 13,000 balena gri, numri më i ulët që nga vitet 1970.
“Shumë nga këto balena gri duken shumë të dobësuara, shumë të dobësuara”, tha Kalambokidis.
Migrimi i tyre drejt veriut është zakonisht periudha më e vështirë, sepse atëherë ata mbeten pa ushqim për kohën më të gjatë, të detyruar të përdorin rezervat e tyre ushqyese.
“Kur kjo ndodh, shpesh sheh balena gri në një kërkim të dëshpëruar për vende të reja ushqimi”, tha Kalambokidis. “Ndoshta kjo i ndodhi kësaj balene.”
Studiuesit do të përpiqen ta shqyrtojnë balenën e ngordhur, ndoshta që të hënën.
