Ish-presidenti francez Nicolas Sarkozy deklaron se është gati të përballet me burgun, ndërsa përgatitet të nisë dënimin me pesë vjet heqje lirie.
Sipas gazetës La Tribune Dimanche, Sarkozy pritet të transferohet të martën në burgun “Sante” në Paris. Ai ka pranuar me qetësi vendimin e gjykatës, duke thënë:
“Kam bërë gati valixhet dhe jam i qetë. Nuk kam frikë nga burgu. Do ta mbaj kokën lart, edhe përpara portave të Sante-s.”
Ish-udhëheqësi francez është dënuar për përpjekje për të siguruar fonde elektorale nga Libia në fushatën e tij presidenciale të vitit 2007 – një akuzë që ai e ka mohuar vazhdimisht.
Gazeta raporton se Sarkozy do të mbahet në izolim për arsye sigurie, në katin e sipërm të pavijonit të posaçëm, i ndarë nga të burgosurit e tjerë dhe nën mbikëqyrje të vazhdueshme nga një roje. Ai do të ketë mundësi të bëjë dy dalje në ditë në njërën nga palestrat ose oborret e ushtrimeve të institucionit.
Bashkëshortja e tij, supermodelja italiane Carla Bruni, thuhet se do ta vizitojë çdo ditë gjatë pesë viteve të dënimit. Sarkozy ndërkohë ka bërë të ditur se nuk synon të ankohet apo të kërkojë privilegje të veçanta:
“Nuk dua mëshirë. Do ta kaloj këtë periudhë duke reflektuar dhe duke shkruar një libër,” – është shprehur ai.
Nicolas Sarkozy, që udhëhoqi Francën nga viti 2007 deri në 2012, u shpall fajtor për konspiracion kriminal në lidhje me përpjekjet e bashkëpunëtorëve të tij për të marrë fonde nga regjimi i Muammar Gaddafit. Ai e ka apeluar vendimin, duke këmbëngulur se është i pafajshëm.
Ky është rasti i parë në historinë e Francës ku një ish-president shpallet fajtor për përfshirje në financime të paligjshme të huaja.
/tiranapost
