Gjykata Themelore në Mitrovicë, dega në Vushtrri, ka shpallur aktgjykimin ndaj të akuzuarit F.K., duke e dënuar me një vit e katër muaj heqje lirie për keqtrajtim gjatë ushtrimit të detyrës zyrtare dhe ngacmim seksual.
Lajmin për KosovaPress e konfirmoi zëdhënësja e Gjykatës së Mitrovicës, Hateme Haxhaj.
“Gjykata Themelore në Mitrovicë – Dega në Vushtrri, ka bërë shpalljen e aktgjykimit ndaj të pandehurit F.K., duke i shqiptuar dënim unik për burgim në kohëzgjatje prej 1 vit e 4 muaj, për kryerjen e veprave penale keqtrajtim gjatë ushtrimit të detyrës zyrtare ose autorizimeve publike dhe ngacmim seksual”, tha Haxhaj për KosovaPress.
Avokatja Laura Tahiri, përfaqësuese ligjore e njërës nga viktimat e mitura, tha për KosovaPress se ky është një vendim që bart mesazh të rëndësishëm për rastet e ngjashme.
“Vendimi është dënues. Arsimtari është shpallur fajtor për dy veprat e kryera – keqtrajtim dhe ngacmim seksual, sipas Kodit Penal të Republikës së Kosovës. Mua si mbrojtëse, përtej barrës ligjore që e kam pasur në këtë proces penal, shumë e rëndësishme ka qenë mesazhi që japim pas përfundimit të tij”, tha Tahiri.
Ajo theksoi se ky rast dëshmon seriozitetin me të cilin duhet të trajtohen veprat penale ndaj të miturve, sidomos brenda institucioneve arsimore.
“Në rastin konkret, ky dënim tregon seriozitetin e veprës penale. Raste të tilla dhe kjo dukuri nuk duhet të mbeten të izoluara brenda institucioneve shkollore, por duhet të raportohen në institucionet kompetente, të trajtohen në gjykata dhe të merren vendime ndëshkuese”, përfundoi ajo.
