Problemet me gjumin janë aq të shpeshta saqë studimet e fundit thonë se 1 në 3 persona ka vështirësi të flejë në mbrëmje. Por, e dije që mungesa e gjumit mund të jetë tregues i problemeve serioze me marrëdhënien tënde romantike?
Psikologia Deborah Gilman, e specializuar në traumat e familjeve dhe të rriturve, shpjegon se mungesa e gjumit ka raste kur përdoret si mjet abuzimi nga partneri.
“Pra, një nga partnerët e shtyn personin që ka në krah të rrijë pa gjumë dhe e nxit në mënyra të ndryshme që të mos flejë mjaftueshëm për ta pasur më të lehtë dominancën në marrëdhënie”, shpjegon ajo.
Por si mund të ndodhë kjo?
Gjumi është shumë i rëndësishëm për funksionimin e trupit në tërësi, çdo ditë. Nëse dikush nuk fle mjaftueshëm, të nesërmen jo vetëm do jetë i rraskapitur, por as nuk mendon dot qartë. Me këtë taktikë, personi që e përdor mund të arrijë të marrë çdo gjë prej personit tjetër vetëm sepse fiton kontroll mbi të.
Për të kuptuar nëse dikush është apo ti vetë je në një raport të tillë shiko për këto shenja:
Zgjime pa arsye reale nga partneri gjatë natës, që bëhen të shpeshta dhe të pallogjikshme.
Bisedat e orëve të vona, jo vetëm zgjaten, po kthehen në shqetësim të përditshëm që ta bën të pamundur të flesh e qetë.
Ndjesia e fajit përdoret si taktikë në çdo moment dhe ushqehet nga biseda të rastësishme, vetëm ose në prani të të tjerëve.
Ndjen se partneri zgjohet për të të vëzhguar herë pas here.
Krijimi i zhurmave dhe rrëmujës së qëllimtë në ambientet ku ti po fle.
Nëse dyshon se diçka e tillë po të ndodh, besoji instiktit dhe tregohu më vigjilente ndaj sjelljeve, edhe duke i mbajtur shënim.
E mira është të flasësh me një specialist për ecurinë, por nëse arrin të kesh kontroll mbi emocionet e tua, mund ta përballësh partnerin me faktet.
