Partia Demokracia e Re e kryeministrit grek Kyriakos Mitsotakis ka prezantuar si kandidat për eurodeputet Fredi Belerin, i cili ndodhet aktualisht në burg për blerje votash.
Nëse Fredi Beleri, fiton mandatin si eurodeputet, ai heq përfundimisht dorë nga betimi për kryetar në Himarë. Ligji ynë ndalon që një kryetar bashkie të jetë deputet.
Deklarata e Fredi Belerit nga burgu: Të dashur bashkatdhetarë të mi, sot kryeministri Kyriakos Mitsotakis më ofroi mundësinë për të kërkuar votën e popullit grek në zgjedhjet europiane të qershorit 2024. E falënderoj për këtë, por mbi të gjitha e falënderoj për mbështetjen e pandërprerë që më ka ofruar gjatë gjithë këtyre muajve që jam në burg. Beteja që po bëj nuk është personale. Është një betejë për shtetin ligjor dhe demokracinë, rregullat e së cilës duhet të respektohen nga të gjithë. Është një betejë për vlerat që përfaqëson Perëndimi dhe Europa dhe të cilat duhet të respektohen nga ata që duan t’i bashkohen familjes së madhe evropiane. Është një betejë për pjesën më të vuajtur dhe të padrejtë të helenizmit, minoritetin grek të Shqipërisë. Vëllezërit e mi që pas dekadash shtypjeje duan dhe kanë të drejtë të jetojnë të lirë dhe të qetë, pa frikë, në një vend që respekton të drejtat, nderin dhe pronën e tyre. I bëj thirrje çdo greku dhe gruaje të mbështesë votën e Demokracisë së Re, të mbështesë kryeministrin që po ndërton me vendosmëri një metodë për një Greqi të fortë dhe krenare, Kyriakos Mitsotakis.
Në Shqipëri po pritet Apeli u GJKKO për një vendim të formës së prerë për Fredi Belerin.
/tiranapost
