Ish-ministri i Jashtëm sllovak, Miroslav Lajčák, i cili ka shërbyer edhe si i dërguar i Bashkimit Evropian për dialogun Kosovë–Serbi, ka dhënë dorëheqjen nga posti i këshilltarit të kryeministrit të Sllovakisë. Kryeministri Robert Fico (Smer) e ka pranuar dorëheqjen e tij.
Fico tha se “nuk kam parë kaq shumë hipokrizi kohët e fundit” dhe mbrojti Lajčákun, i cili vendosi të largohet për shkak të komunikimit me Jeffrey Epstein.
Lajčák u shpreh se nuk ka marrë pjesë, nuk ka qenë dëshmitar dhe nuk ka pasur informacion për asnjë veprim të paligjshëm seksual. Ai theksoi se bisedat e publikuara me Epstein ishin të shkurtra, joformale dhe pa përmbajtje reale, duke shtuar se nëse do të kishte ditur më herët për krimet e Epstein, nuk do të kishte pasur asnjë komunikim me të, raportojnë mediat.
Opozita dhe partneri i koalicionit, SNS, kishin kërkuar largimin e Lajčákut nga pozita e këshilltarit. Ai ka deklaruar se do të diskutojë personalisht me kryeministrin për dorëheqjen, me qëllim që Fico të mos përballet me pasoja politike për diçka që nuk ka lidhje me vendimet e tij.
Departamenti Amerikan i Drejtësisë ka publikuar më shumë se tre milionë faqe dokumentesh në lidhje me çështjen Epstein, ku përmenden figura të njohura publike, përfshirë presidentin e SHBA-së Donald Trump, ish-presidentin Bill Clinton dhe ish-ministrin e Jashtëm sllovak, Miroslav Lajčák.
/tiranapost
