Një i ri nga Tirana është arrestuar nga Shërbimet e Komisariatit Nr.1 në Tiranë, pas njoftimit në sallën operative se kishte qëlluar me armë afër shtëpisë së të afërmve të tij. Nga kontrolli në shtëpi, shtetasit me iniciale Dh.Th i janë gjetur krehra dhe municion luftarak.
“Shërbimet e Komisariatit të Policisë Nr. 1, në vijim të punës për garantimin e sundimit të ligjit në territor, pas informacionit të marrë se në fshatin Zaranikë, një shtetas kishte qëlluar me armë zjarri që e mbante pa leje në banesë, kanë organizuar punën në kuadër të operacionit mbarëkombëtar “Sundimi i ligjit” dhe si rezultat kanë vënë në pranga shtetasin:
– Dh. Th., 27 vjeç, banues në Shkozë.
Ky shtetas, mbrëmjen e djeshme, ka qëlluar me armë zjarri kallashnikov në afërsi të banesës së të afërmve të tij. Gjatë kontrollit në një ambient në afërsi të kësaj banese, shërbimet e Policisë kanë gjetur dhe sekuestruar një armë zjarri automatik, dy krehra dhe municion luftarak, që dyshohet se i posedonte ky shtetas”, thuhet në njoftimin e Policisë së Tiranës.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
A ju ndihmoi ky artikull?PoJo
