Avokati amerikan i Hashim Thaçit, Pierre Prosper, ka kritikuar ashpër Zyrën e Prokurorit të Specializuar (ZPS), duke e akuzuar për arrogancë, mungesë respekti dhe injorancë ndaj dëshmitarëve ndërkombëtarë që kanë dëshmuar në procesin gjyqësor në Hagë.
Reagimi i Prosper erdhi pasi Prokuroria vlerësoi se disa diplomatë dhe zyrtarë të lartë ndërkombëtarë kishin informacione të kufizuara për zhvillimet në Kosovë gjatë periudhës së luftës.
Prosper tha se kishte biseduar me një diplomat të lartë lidhur me deklaratat e Prokurorisë.
“Dje komunikova me një diplomat të lartë, ambasador, i dërguar i posaçëm. I lexova disa nga citimet e ZPS-së. Më tha: ‘Është e tmerrshme, kaq pak respektojnë profesionin tonë’. Këto komente tregojnë arrogancë dhe mungesë respekti, e cila ka qenë e pranishme që nga fillimi.”
Ai theksoi se shtatë dëshmitarët ndërkombëtarë që kanë dëshmuar në Hagë janë profesionistë me përvojë, të cilët kanë qenë të përfshirë drejtpërdrejt në përpjekjet për paqe në Kosovë.
“Të rrëzosh përvojat dhe dëshmitë e këtyre profesionistëve, të cilët kanë pasur për detyrë të analizojnë situatat dhe të shikojnë ngjarjet në terren, është problematike,” tha Prosper.
Prosper përmendi emra konkretë si gjenerali Wesley Clark, James Rubin, Paul Williams, ambasadori Christopher Hill dhe diplomatë të tjerë, duke theksuar se ata kishin informacione të dorës së parë.
“Prokuroria do që ne të besojmë se ata kishin informacione të kufizuara. Këta persona nuk kishin shkuar për safari në Kosovë. Ata kishin raporte nga organizata ushtarake e civile, nga OJQ-të, kishin debate të brendshme dhe konstatime personale në terren.”
Ai shtoi se James Rubin, si zyrtar i lartë amerikan, ishte caktuar posaçërisht për të kuptuar se kush ishte Hashim Thaçi dhe çfarë roli kishte, ndërsa gjenerali Clark kishte qasje në informacione të nivelit më të lartë ushtarak.
Sipas Prosper, mënyra se si Prokuroria po i trajton këta dëshmitarë rrezikon besueshmërinë e drejtësisë ndërkombëtare.
“Nuk është për t’u habitur që qeveritë dyshojnë në besueshmërinë e tribunaleve ndërkombëtare, sepse kur profesionistët dalin e tregojnë çfarë ka ndodhur dhe deklaratat e tyre hidhen poshtë, kjo është problematike.”
Ai theksoi se dëshmitarët përfaqësojnë shtete si Shtetet e Bashkuara të Amerikës, Britaninë, vendet e NATO-s dhe të tjera, duke kërkuar që të paktën të respektohet roli dhe përvoja e tyre profesionale.
“Mund të mos ju pëlqejnë dëshmitë e tyre, por duhet të respektoni rolin që kanë pasur, profesionet e tyre dhe shtetet që përfaqësojnë,” përfundoi Prosper.
Deklaratat e Prosper u bënë në kuadër të fazës përmbyllëse të mbrojtjes në procesin gjyqësor ndaj ish-krerëve të UÇK-së në Dhomat e Specializuara në Hagë.
